Osy Shardarada 26 qazanda elimizde tuńǵysh ret «SAFARI SHARDARA» halyqaralyq festivaly boldy. Elbasynyń «Bolashaqqa baǵdar: rýhani jańǵyrý» baǵdarlamasy aiasynda ótkiziletin festivalde avtokólikterdiń qumdaǵy jarysy men kompozitsiialyq «Rock racing» shoýy uiymdastyryldy. Shýdalary jelkildegen túielerdiń teńiz jaǵalaýynyń shaǵylyn aspanǵa atqan jarysy, at ústindegi saiatshylardyń búrkit salýy, teńiz betindegi aq jelkendi qaiyqtardyń qatar júzýi, eskek esý men balyq aýlaý saiysy, jaǵalaý voleiboly, qazaqsha kúres, akrobatikalyq oiyndar, motobaikerlerdiń motokross ónerin jaǵalaýǵa syimai ketken qalyń eldiń tamashalaýynyń ózi bir ǵanibet! Túrki áleminiń ordasy Túrkistannan shyqqan motobaikerler elimizdiń kóq týyn jelbiretip, Shardaraǵa kelip kirýiniń ózi bir keremet kórinis boldy. Al jol talǵamaityn jipterdiń 20 shaqyrymǵa alaman jarysyn aityp jetkizý qiyn! Bir jaqta qol kúresi júrip jatty. Aitpaqshy, qol kúresinen álemdik qurama Shardarada ekenin oqyrman qaýym jaqsy biletin bolar. Óitkeni Shardaradan 24 álem chempiony, 52 Aziia chempiony shyqqan! Shardaradaǵy sharaǵa barlyq aýdannan ókilder qatysyp, kiiz úilerin tigip tastady. Túrli qolóner men jergilikti ónimder jármeńkesi qatar bolyp jatty. Áigili ánshi-sazger Marat Omarov bastaǵan óner juldyzdary ásem án men tátti kúilerimen, tartymdy bilerimen eldi riza etti.
Budan baiqaǵanymyzdai, «Uiymdastyra bilgen utady» degendei, iskerlik pen ideologiialyq qabiletti qatar ushtastyra bilgen, rýhaniiatqa qamqor rýhy biik qairatker Janseiit Qanseiitulynyń basshylyǵymen, qasietti Túrkistannyń atyn ielengen ólke jańa qarqynmen jarqyrap keledi.
Týrizmdi damytýǵa jáne ulttyq sportymyz ben saiatshylyq ónerimizdi damytýǵa arnalǵan halyqaralyq festivalda oblys ákimi J.Túimebaev Mońǵoliiadan kelgen álemge áigili bolǵan búrkitshi qazaq qyzy Aisholpan Nurǵaiypqyzyna million teńge syilyq tapsyrdy. Sonymen qatar Shardara aýdany sport bólimi men álemniń 9 dúrkin chempiony (5 ret jasóspirimder arasynda, 4 ret eresekter arasynda) Nurdáýlet Myrzahanuly Aidarhanǵa sheteldik temir tulpar mingizdi.
Qasymyzdaǵy jolbasshy baýyrymyz Tursan Qabylov Nurdáýlet inisin quttyqtap úlgeripti. «Shynymen eshkimnen jeńilip kórmegensiń be?»-dep suraǵan eken, Nurdáýlet: «Iá, eshkimnen jeńilip kórmegenmin. Tek ákemmen qol kúreskende ǵana qalai ekenin bilmeimin, jeńilip qala beremin» dep jaýap beripti. «Ákesi meniń klastasym ǵoi. Iá, ol da qara kúshtiń iesi bolatyn» dep, men de birden Almatyda eshnárseden habarsyz júrgen Myrzahan dosyma telefon soǵyp, Álem chempionynyń ákesin quttyqtap qoidym.
Shardara aýdany ákimi Bolatbek Qystaýovqa «Aq jol» partiiasy tóraǵasy, Májilis depýtaty Azat Perýashevtyń «Safari Shardara» halyqaralyq festivalyna Aq jol tilegen quttyqtaýyn tapsyryp, eldiń suraýymen «Shardara» jyryn oqyp berdim.
Halyqaralyq festivalǵa birneshe elden qonaqtar, jarysqa qatysýshylar keldi. Ásirese, keshe ǵana dúnieden ótken belgili ǵalym, akademik Ábdimusa Qýatbekov aǵamyz negizin qalaǵan Shymkenttegi Halyqaralyq «Dostyq» ýniversitetiniń stýdentteri festivaldyń kórkin qyzdyrdy.
Shetelden kelgender Shardaranyń tamasha tabiǵatyna tańǵalyp júrdi. Qazaqstandyqtardyń ózderiniń keibireýleri de: «Bizde de osyndai keremet jer bar eken ǵoi» dep qoiady. Iá, ózim de, ótkende ǵana jazda «Altyn jaǵajaida» eki-úsh kún bolǵanda «Shardaranyń tabiǵaty Antaliiadan artyq bolmasa, kem emes» degen maqala jazyp ketkenmin. Mine, naǵyz týrizmniń órisi men jemisi retinde damytatyn óńir osy – shalqyǵan Shardara!
Shardaranyń týrizm ordasy bolarlyq keremet kelbetin kórsetetin «SAFARI SHARDARA» halyqaralyq festivaly eki jyl saiyn ótkiziletin bolady.
Kieli Túrkistan ólkesi túlep, shaǵyldy da, shaǵalaly Shardara shartarapqa tanylyp, sharyqtap, shalqyp jatyr.
Qyzylqumy qulpyrsa mań dalanyń,
Shalqyp jatqan teńizge tańǵalamyn.
Safaridiń sapary sátti bolyp,
Aty álemge tanylsyn Shardaranyń!
Qazybek ISA, aqyn.
