Kólik ministrligi aqyly joldardan túsetin kiristiń bir bóligin jol qurylysyna alynǵan nesielerdiń paiyzdyq mólsherlemesin jabýǵa baǵyttamaq. Bul týraly ministr Marat Qarabaev málimdedi, dep habarlaidy Dalanews.kz.
Aitýynsha, qazirgi tańda eldegi aqyly jol júiesi 3,2 myń shaqyrymdy qamtidy. Biyl qosymsha 4 myń shaqyrym jol aqyly júiege qosylyp, odan 60 milliard teńge tabys túsedi dep josparlanǵan. 2026 jyly bul kórsetkish 100 milliard teńgege jetýi múmkin.
“Qazirgi ýaqytta osy qarajattyń bir bóligin jol qurylysyna alynǵan nesielerdi óteýge baǵyttaý múmkindigi qarastyrylýda. Ótken jyly aqyly joldardan túsken tabys 48 milliard teńgeni qurady,” – dedi Qarabaev.
Sondai-aq ministr jol boiyndaǵy infraqurylymdy damytýǵa erekshe nazar aýdarylyp jatqanyn aitty.
“Búginde elimizde 1,4 myń servistik nysan bar, olardyń 90%-y ulttyq standarttarǵa sai keledi. Biyl bul kórsetkish 100%-ǵa jetýi kerek. Oǵan qosa, iri investorlar – QazaqOil, RoyalPetrol jáne Compass 400-den astam nysan salýdy jáne jańǵyrtýdy josparlap otyr. Jalpy, 2029 jylǵa deiin 60 servistik keshen salý kózdelgen, onyń 10-y biyl iske qosylady. Jobaǵa 120 milliard teńge investitsiia qarastyrylǵan. Bul nysandarda avtoturaqtar, janarmai quiý beketteri, demalys oryndary qarastyrylady. Sonymen qatar, Qazaqstanda alǵash ret ulttyq qonaqúi jelisi men onyń franshizasyn damytý josparlanyp otyr,” – dedi ministr.
Aita keteiik, buǵan deiin Marat Qarabaev Astanadaǵy LRT qurylysyna Ulttyq Qordan qarjy bólingenin rastaǵan edi.
Ministrdiń aitýynsha, biyl jobany aiaqtaý úshin qosymsha qarjy bólingen. Alaida onyń naqty qai kózden alynǵanyn jáne qandai investorlardyń qatysqanyn jergilikti bilik sheshken.
“Bul máselemen tolyqtai Astana ákimdigi ainalysty, sondyqtan qarjy kózderine qatysty egjei-tegjeili aqparat bere almaimyn. Jalpy, qurylys jumystary men onyń iske qosylýy ákimdiktiń quzyrynda”, – dep túsindirdi ministr.
Sonymen qatar ol Ulttyq qordan qarjy bólingeni týraly málimetti rastady.
“Iá, belgili bir soma Ulttyq qordan bólindi. Óitkeni bul qarajatty bólý bizdiń ministrlik arqyly júzege asyryldy,” – dedi Marat Qarabaev.
