كولىك مينيسترلىگى اقىلى جولداردان تۇسەتىن كىرىستىڭ ءبىر بولىگىن جول قۇرىلىسىنا الىنعان نەسيەلەردىڭ پايىزدىق مولشەرلەمەسىن جابۋعا باعىتتاماق. بۇل تۋرالى مينيستر مارات قارابايەۆ مالىمدەدى، دەپ حابارلايدى Dalanews.kz.
ايتۋىنشا، قازىرگى تاڭدا ەلدەگى اقىلى جول جۇيەسى 3،2 مىڭ شاقىرىمدى قامتيدى. بيىل قوسىمشا 4 مىڭ شاقىرىم جول اقىلى جۇيەگە قوسىلىپ، ودان 60 ميلليارد تەڭگە تابىس تۇسەدى دەپ جوسپارلانعان. 2026 جىلى بۇل كورسەتكىش 100 ميلليارد تەڭگەگە جەتۋى مۇمكىن.
“قازىرگى ۋاقىتتا وسى قاراجاتتىڭ ءبىر بولىگىن جول قۇرىلىسىنا الىنعان نەسيەلەردى وتەۋگە باعىتتاۋ مۇمكىندىگى قاراستىرىلۋدا. وتكەن جىلى اقىلى جولداردان تۇسكەن تابىس 48 ميلليارد تەڭگەنى قۇرادى،” – دەدى قارابايەۆ.
سونداي-اق مينيستر جول بويىنداعى ينفراقۇرىلىمدى دامىتۋعا ەرەكشە نازار اۋدارىلىپ جاتقانىن ايتتى.
“بۇگىندە ەلىمىزدە 1،4 مىڭ سەرۆيستىك نىسان بار، ولاردىڭ 90%-ى ۇلتتىق ستاندارتتارعا ساي كەلەدى. بيىل بۇل كورسەتكىش 100%-عا جەتۋى كەرەك. وعان قوسا، ءىرى ينۆەستورلار – QazaqOil، RoyalPetrol جانە Compass 400-دەن استام نىسان سالۋدى جانە جاڭعىرتۋدى جوسپارلاپ وتىر. جالپى، 2029 جىلعا دەيىن 60 سەرۆيستىك كەشەن سالۋ كوزدەلگەن، ونىڭ 10-ى بيىل ىسكە قوسىلادى. جوباعا 120 ميلليارد تەڭگە ينۆەستيسيا قاراستىرىلعان. بۇل نىسانداردا اۆتوتۇراقتار، جانارماي قۇيۋ بەكەتتەرى، دەمالىس ورىندارى قاراستىرىلادى. سونىمەن قاتار، قازاقستاندا العاش رەت ۇلتتىق ءقوناقۇي جەلىسى مەن ونىڭ فرانشيزاسىن دامىتۋ جوسپارلانىپ وتىر،” – دەدى مينيستر.
ايتا كەتەيىك، بۇعان دەيىن مارات قارابايەۆ استاناداعى LRT قۇرىلىسىنا ۇلتتىق قوردان قارجى بولىنگەنىن راستاعان ەدى.
ءمينيستردىڭ ايتۋىنشا، بيىل جوبانى اياقتاۋ ءۇشىن قوسىمشا قارجى بولىنگەن. الايدا ونىڭ ناقتى قاي كوزدەن الىنعانىن جانە قانداي ينۆەستورلاردىڭ قاتىسقانىن جەرگىلىكتى بيلىك شەشكەن.
“بۇل ماسەلەمەن تولىقتاي استانا اكىمدىگى اينالىستى، سوندىقتان قارجى كوزدەرىنە قاتىستى ەگجەي-تەگجەيلى اقپارات بەرە المايمىن. جالپى، قۇرىلىس جۇمىستارى مەن ونىڭ ىسكە قوسىلۋى اكىمدىكتىڭ قۇزىرىندا”، – دەپ ءتۇسىندىردى مينيستر.
سونىمەن قاتار ول ۇلتتىق قوردان قارجى بولىنگەنى تۋرالى مالىمەتتى راستادى.
“ءيا، بەلگىلى ءبىر سوما ۇلتتىق قوردان ءبولىندى. ويتكەنى بۇل قاراجاتتى ءبولۋ ءبىزدىڭ مينيسترلىك ارقىلى جۇزەگە اسىرىلدى،” – دەدى مارات قارابايەۆ.
