Atyraý oblysynda qaiyn jurtyn óltirdi degen kúdikke ilingen Sultan Sársemálievtiń áieli Aqbaian Muqanǵalievaǵa qatysty qylmystyq qýdalaý toqtatyldy, dep habarlaidy dalanews.kz.
Atyraý oblysy prokýrorynyń kómekshisi Jandar Bolatbektiń aitýynsha, tergeý barysynda Aqbaian Muqanǵalievanyń kisi óltirý deregine qatysy bar ekeni anyqtalmaǵan.
"Áieldiń kisi óltirý faktisine qatysy bolmaǵandyqtan, oǵan qatysty qylmystyq qýdalaý toqtatyldy. Al qylmys týraly habarlamaý faktisi boiynsha bólek is tirkeldi. Degenmen oǵan áli quqyqtyq baǵa berilgen joq. Aqbaian Muqanǵalieva bul is boiynsha kúdikti dep tanylǵan joq. Oǵan qatysty bultartpaý sharasy da qoldanylmaǵan", – dedi Jandar Bolatbek.
Buǵan deiin Muqanǵalievaǵa Almatyda psihiatriialyq saraptama júrgizilip jatqany habarlanǵan edi. Atyraý oblysy prokýratýrasynyń málimetinshe, saraptama qorytyndysy ázirge shyqpaǵan.
Osyǵan bailanysty Aqbaian Muqanǵalievanyń áreketine quqyqtyq baǵa onyń psihikalyq jaǵdaiy tolyq anyqtalǵannan keiin beriledi.
