Aqtóbede alty balanyń anasy qala ákimi Azamat Beketke shaǵymdanyp, ony jaýapqa tartýdy talap etti. Aitýynsha, ákimdik kópbalaly otbasyny apatty jaǵdaidaǵy jataqhanaǵa qonystandyrǵan, dep habarlaidy Dalanews.kz Orda.kz-ke silteme jasap.
Kópbalaly ana Gúljan Seidildina ákimdikten ýaqytsha baspana suraǵanda, sheneýnikter oǵan qiraýǵa shaq qalǵan, resmi túrde apatty dep tanylǵan ǵimarattan bólme bergen.
“Maǵan “jataqhana bar” dedi de, kiltin ustatty. Bólim basshylary — Madiiar men Arýjan, depýtat Nurjamal, tipti ákimniń ózi de jaǵdaidan habardar edi. Men onyń kómekshisine de aittym. Arnaiy komissiia sonda barýymdy usyndy. Biraq ol jerde ómir súrý múmkin emes. Tóbeleri shirip ketken, terezeleri synǵan, qabyrǵalary kógerip, búkil jerde taraqandar órip júr”, — deidi áiel.
Ol bul bólmege amalsyz barǵanyn aitady. Jaǵdaiy kúrt nasharlap, eki ai boiy jaldamaly páterge aqsha tólei almaǵan.
“Maǵan ota jasaldy, sodan keiin qiyndyqtar bastaldy. Aqyrynda páterden shyǵaryp jiberdi. Balalarmen birge dalada qalmas úshin, ákimdik usynǵan bólmege bardym”, — deidi ol.
Qazir ol apatty jaǵdaida dep tanylǵan sol jataqhanada tórt balasymen birge turyp jatyr. Úlken eki balasy bólek ketken. Jataqhanaǵa kóship kelgenine bes kún bolǵan.
“Bul úidiń qabyrǵalary kógerip ketken, ishi sasyq, kún saiyn taraqandar qaptaidy. Keshe túnde bir taraqan balamnyń qulaǵyna kirip ketti. Jedel járdem shaqyrtýǵa týra keldi. Qorqynyshtysy — bul úi resmi túrde adam turýǵa jaramsyz dep tanylyp, súrýge jatqyzylǵan. Biraq soǵan qaramastan, ákimdik munda balalarymen birge otbasylardy qonystandyryp jatyr”, — deidi Gúljan.
Ol bul ǵimarattyń bireýdiń jeke múddesine jumys istep jatqanyn da joqqa shyǵarmaidy.
“Munda basqa jalǵyzbasty analar da turyp jatyr. Qarasam, bólmeler jalǵa berilip jatqan siiaqty. Biraq kim jalǵa berip otyr? Belgisiz. Ákimdik qyzmetkerleri me, álde olarmen bailanysy bar adamdar ma? Nege apatty úi bireýdiń ieliginde júr? Nege adamdardyń ómirine qaýip tóndire otyryp, ol páterler jalǵa berilip jatyr?”, — dep ashynady áiel.
Gúljan Seidildina 2018 jyldan beri kópbalaly ana retinde turǵyn úi kezeginde tur. Qazirgi tańda onyń kezegi — 335-oryn.
Aqtóbe ákimdiginen resmi túsinikteme suralǵanda, olar Grishin kóshesi, 72-úidiń rasymen de tehnikalyq saraptama negizinde apatty dep tanylǵanyn rastady. Onda qazirgi ýaqytta 13 otbasy turyp jatyr. Barlyǵy — “tolyq emes otbasy” sanaty boiynsha turǵyn úi kezeginde turǵandar.
“Seidildina ákimdikke ómirlik qiyn jaǵdaiyna bailanysty ótinishpen júgindi. Komissiia onyń jaǵdaiyn tyńdap, zańǵa sáikes, kezekten tys úi berý múmkin emes ekenin túsindirdi. Áieldiń ózi turǵyn úi bólimi balansyna qaraityn úilerden bólme qarastyrýdy surady. Sol kezde tek Grishin, 72 mekenjaiyndaǵy jataqhanadan eki bos bólme ǵana bolǵan. Biz ol úidiń apatty ekenin ashyq aittyq. Seidildina sol bólmeni ózi baryp kórýdi qalady. 16 maýsymda kilt berildi, biraq eshqandai kelisimshart jasalǵan joq”, — dedi ákimdik ókili Aigúl Baimenova.
Onyń aitýynsha, kilt ýaqytsha túrde, tek kórý úshin berilgen. Alaida material jariialanar sátte Gúljan Seidildina taǵy da redaktsiiamen bailanysqa shyǵyp, ákimdik qyzmetkerleri kiltti qaitarýdy talap etip jatqanyn aitqan.
