Jambyl oblysy Turar Rusqulov aýdany Qulan aýylynda 6 jasar bala kóz jumdy. Týystarynyń sózinshe, buǵan dárigerlerdiń salǵyrttyǵy sebep bolǵan, dep habarlaidy Dalanews.kz.
Jelide marqumnyń týystarynyń úndeýi tarady.
"Bala 29 qyrkúiekten bastap aýyrdy, ýchaskelik dárigerge barǵanymyzda esh kómek kórsetpei, úige qaitardy. Balanyń apasy dárigerge tizerlep jalynyp, áreń 7 qazanda ǵana aýrýhanaǵa jatqyzdy. Bala aýrýhanaǵa jatqanymen, diagnoz qoiylmaǵan, bala aýyrǵanda tek "Kreon" dárisin bere bergen. Búgin, 10 qazanda baladan aiyrylyp qaldyq", - deidi týystary.
T.Rysqulov aýdandyq ortalyq aýrýhanasy bul jaǵdaiǵa qatysty mynadai pikir bildirdi:
"Aýrýhanaǵa 6 jasar bala "jatqyzý portaly" arqyly josparly túrde apasymen birge túsken. 7 qazannan beri klinikalyq hattamaǵa sáikes tiisti zertteýler jasalyp, taǵaiyndalǵan emdi qabyldaǵan. Balanyń jaǵdaiy ortasha aýyr bolǵan. 10 qazanda saǵat 06.55-te kenet qaitys bolǵan. Qazir balanyń óliminiń sebebi anyqtalyp jatyr. Ishki ister bólimine habarlanǵan, sot saraptamasy taǵaiyndalǵan", - dedi dárigerler.
