Keiingi kezderi buryndary eks-prezidenttiń qaryndasy Ánipa Nazarbaevaǵa tiesili bolǵan "Kenjehan" bazarynyń aty atalǵan kezde Sergei Kim atty adamnyń esimi de qatar aitylyp júr. ZhasAlash tilshisi Sergei Kimniń kim ekenin anyqtap kórgen, - dep habarlaidy Dalanews.kz.
Saýdagerler Nazarbaevadan aqshalaryn qaitarýyn talap etip, Sergei Kim kelip qaitadan 5-7 millionnan jinai bastaǵanyn aitqan. Sergei Kimniń ózi Ánipa Nazarbaevanyń adamy desedi. Saýdagerlerdiń sózinshe, Nazarbaeva Kim arqyly bazardy da basqaryp otyrǵan kórinedi.
Sergei Kimniń Ánipa Nazarbaevaǵa qandai qatysy bar?
Qazir bazar resmi túrde Ánipa Nazarbaevaǵa tiesili emes. Biraq ol 2015 jyldary ár saýdagerden 12 myń dollardan alyp otyrǵan. Bazardyń negizin qalaǵan da Nazarbaeva. Eki jyl buryn bazardy "Mitra" JShS satyp alǵan. Kompaniia 2023 jyly 20 qyrkúiekte qaita tirkeýden ótken. Buǵan deiin iesi ári direktory Elena Rozenberg edi. Al keiinnen onyń basshysy Sergei Kim bolǵan.
Byltyr 21 qyrkúiekten bastap jańa qojaiyn – Manýshina Tatiana Alekseevna. Manýshina Tatianaǵa qatysty málimet joq. Biraq "Kenjehan" isi boiynsha belsendi, Sergei Kimmen sottasyp júrgen Elena Sádýaqasovanyń aitýynsha, Manýshina Tatiana Sergeidiń ekinshi áieli. Ol 2000 jyldary Kimniń kazinosynda jumys istegen.
"Qazir bazar báribir Kimniń qolynda. Tasadan basqarady. Olardyń artynda Ánipa Nazarbaeva tur. Bul málimetterdi men Kimmen eki jyl kúres kezinde anyqtadym", – deidi Elena.
Qysqasha aitqanda, Ánipa Nazarbaevanyń da, Elena Rozenbergtiń de, Sergei Kimniń de qujat boiynsha bul kásiporynǵa qatysy joq. Kompaniia direktory - Ahmetov Jasulan Erlanuly. Quryltaishysy – Manýshina Aleksandra Viktorovna. Al Manýshina Aleksandra Viktorovna degen qazirgi bazar basshysy Manýshina Tatiananyń sheshesi degen málimet bar. Tegine qarasańyz, bul málimettiń tegin emesin baiqaisyz.
Jalpy, Sergei Kimniń basy daýǵa qalyp turǵany bir bul jaǵdai emes eken. Buǵan deiin onyń "AlbaStroiDor" jaýapkershiligi shekteýli seriktestigine qatysty janjaly BAQ betterinde jazylǵan. "AlbaStroiDor" quryltaishysy Denis Lisitsyn men Plutos Group quryltaishysy Vitalii Sharov Sergei Kimnen japa shegip júrgenin aityp, prezident Toqaevqa úndeý joldaǵan.
