Shymkenttegi Sybailas jemqorlyqqa qarsy is-qimyl departamenti bastyǵynyń burynǵy orynbasary Dáýrenbek Qojabaev ustaldy, dep habarlaidy Dalanews.kz.
Antikor onyń Shymkenttegi orta mektepterdiń biriniń direktoryn qylmystyq jaýapkershilikten bosatý úshin para aldy degen kúdikke ilingenin málimdedi. BAQ derekterine sáikes, Dáýrenbek Qojabaev Antikor basshysynyń burynǵy orynbasary Maqsat Qojabaevtyń inisi. Maqsat Qojabaev 2023 jyldyń qarashasynda alaiaqtyq jasaǵany úshin sottalyp, 5 jyl 6 aiǵa bas bostandyǵynan aiyrylǵan bolatyn.
"Dáýrenbek Qojabaevqa tergeýden jasyrynýyna bailanysty halyqaralyq izdeý jariialandy. 30 qarashada Sybailas jemqorlyqqa qarsy agenttik pen Ulttyq qaýipsizdik komitetiniń jedel-izdestirý sharalary nátijesinde ol ustalyp, tergeý izoliatoryna qamaldy", – dep habarlady Antikor.
Eske salaiyq, ótken jyly Sybailas jemqorlyqqa qarsy is-qimyl agenttigi tóraǵasynyń burynǵy orynbasary Maqsat Qojabaev ustalǵan edi.
"2023 jyldyń 9 qańtarynda Ulttyq qaýipsizdik komiteti sotqa deiingi tergeý sheńberinde jemqorlyq quqyq buzýshylyq jasady degen kúdikpen quqyq qorǵaý organdarynyń burynǵy joǵary laýazymdy qyzmetkeri Maqsat Qojabaevty ustady", - delingen Ulttyq qaýipsizdik komiteti taratqan aqparatta.
Maqsat Qojabaev 2021 jyly Sybailas jemqorlyqqa qarsy is-qimyl agenttigi (Sybailas jemqorlyqqa qarsy qyzmettiń) tóraǵasynyń orynbasary laýazymyna taǵaiyndaldy.
Ol bul qyzmetti 2022 jyldyń sáýirine deiin atqardy.
