شىمكەنتتەگى سىبايلاس جەمقورلىققا قارسى ءىس-قيمىل دەپارتامەنتى باستىعىنىڭ بۇرىنعى ورىنباسارى داۋرەنبەك قوجابايەۆ ۇستالدى، دەپ حابارلايدى Dalanews.kz.
انتيكور ونىڭ شىمكەنتتەگى ورتا مەكتەپتەردىڭ ءبىرىنىڭ ديرەكتورىن قىلمىستىق جاۋاپكەرشىلىكتەن بوساتۋ ءۇشىن پارا الدى دەگەن كۇدىككە ىلىنگەنىن مالىمدەدى. ب ا ق دەرەكتەرىنە سايكەس، داۋرەنبەك قوجابايەۆ انتيكور باسشىسىنىڭ بۇرىنعى ورىنباسارى ماقسات قوجابايەۆتىڭ ءىنىسى. ماقسات قوجابايەۆ 2023 جىلدىڭ قاراشاسىندا الاياقتىق جاساعانى ءۇشىن سوتتالىپ، 5 جىل 6 ايعا باس بوستاندىعىنان ايىرىلعان بولاتىن.
"داۋرەنبەك قوجابايەۆقا تەرگەۋدەن جاسىرىنۋىنا بايلانىستى حالىقارالىق ىزدەۋ جاريالاندى. 30 قاراشادا سىبايلاس جەمقورلىققا قارسى اگەنتتىك پەن ۇلتتىق قاۋىپسىزدىك كوميتەتىنىڭ جەدەل-ىزدەستىرۋ شارالارى ناتيجەسىندە ول ۇستالىپ، تەرگەۋ يزولياتورىنا قامالدى"، – دەپ حابارلادى انتيكور.
ەسكە سالايىق، وتكەن جىلى سىبايلاس جەمقورلىققا قارسى ءىس-قيمىل اگەنتتىگى ءتوراعاسىنىڭ بۇرىنعى ورىنباسارى ماقسات قوجابايەۆ ۇستالعان ەدى.
"2023 جىلدىڭ 9 قاڭتارىندا ۇلتتىق قاۋىپسىزدىك كوميتەتى سوتقا دەيىنگى تەرگەۋ شەڭبەرىندە جەمقورلىق قۇقىق بۇزۋشىلىق جاسادى دەگەن كۇدىكپەن قۇقىق قورعاۋ ورگاندارىنىڭ بۇرىنعى جوعارى لاۋازىمدى قىزمەتكەرى ماقسات قوجابايەۆتى ۇستادى"، - دەلىنگەن ۇلتتىق قاۋىپسىزدىك كوميتەتى تاراتقان اقپاراتتا.
ماقسات قوجابايەۆ 2021 جىلى سىبايلاس جەمقورلىققا قارسى ءىس-قيمىل اگەنتتىگى (سىبايلاس جەمقورلىققا قارسى قىزمەتتىڭ) ءتوراعاسىنىڭ ورىنباسارى لاۋازىمىنا تاعايىندالدى.
ول بۇل قىزمەتتى 2022 جىلدىڭ ساۋىرىنە دەيىن اتقاردى.
