Jambyl Jabaevyń sýreti Amerikadan tabyldy, - dep habarlaidy Dalanews.kz Egemen-ge siltep.
Bul - 1951 jyly Niý-Iork qalasynda baspadan shyqqan "Keńester Orta Aziiada" kitaby. Ulybritaniialyq zertteýshi Zelda Koýtes pen Ýilliiam Koýtes birlesip jazǵan bul kitap sol kezdegi keńes odaǵyndaǵy respýblikalardyń jaǵdaiyn baian etedi.
Jambyl atyndaǵy mýzeidiń qazirgi direktory, Jambyl Jabaevtyń nemeresi Saltanat Tezekbaiqyzy Jambylovanyń sózinshe, bul sýret negizinen II dúniejúzilik soǵystan buryn túsirilgen bolýy kerek.
"Ol kisiniń sýretteri óte kóp, biraq mynaý ózgeshe sýret eken. Óitkeni bul jerde otyrǵan kisiler de – bizge tanys adamdar. Sol jaqta maldas quryp otyrǵan kisi – Ǵali Ormanov, Jambyl atamyzdyń ádebi hatshysy bolǵan. Al aq jeideli, jerde jantaiyp jatqan – atamyzdyń aýdarmashysy, hatshysy Pavel Nikolaevich Kýznetsov, ar jaǵynda otyrǵan kisi Qadyr Hasenov. Atamyzdyń biraz óleńin uiǵyr, qytai tiline aýdarǵan. Oń jaqta jantaiyp jatqan kisi – meniń ákem Tezekbai Jambyluly. Al kiiz úidiń bosaǵasynda otyrǵan – atamyzdyń uly Qojashtyń qyzy Dildáhan tátemiz. Ol kisi seksen jastan asyp qaitys boldy. Biz bul sýretti kórip, qýanyp qaldyq. Atamyzdyń 1936–1945 jyldar aralyǵyndaǵy sýretteri bizge jetken, al onyń aldyndaǵy kezden 1913 jylǵy bir sýret qana bar, osy jyly Romanovtar áýletiniń patshalyq qurǵanyna 300 jyl tolýyna bailanysty Jetisý óńirinen 15 aqyndy aq patshany maqtap, óleń aitasyńdar dep shaqyrǵan eken, sondaǵy sýreti saqtalǵan. Men 1981 jyldan bastap atamyzdyń atyndaǵy mýzeide jumys istep kelemin, ǵylymi qyzmetker, qor saqtaýshy bolyp qyzmet atqardym. 2018 jyldyń aiaǵynan beri Jambyl atyndaǵy mýzeidiń direktory bolyp jumys isteimin, bul sýrettiń bizde qalai saqtalmai qalǵanyn bilmeimin", - dedi ol.
