Abai oblysynda kútýshi áiel 91 jastaǵy qariiaǵa dórekilik kórsetken. Oqiǵa Semei qalasynda bolǵan, dep habarlaidy dalanews.kz.
Zeinetkerdiń nemeresi áleýmettik jelide video jariialap, kútýshi áieldiń qart kisige qurmetsizdik tanytyp, qorlaǵanyn málimdedi.
Jariialanǵan beinejazbadan keiin politsiia tekserý jumystaryn bastaǵan. Tártip saqshylarynyń málimetinshe, kútýshi áiel politsiia bólimine jetkizilip, oqiǵanyń barlyq mán-jaiy zerdelengen.
"Tekserý nátijesinde áieldiń áreketterinen Qazaqstan zańnamasynda kózdelgen balaǵattaý belgileri anyqtaldy. Iaǵni, basqa adamnyń ar-namysy men qadir-qasietin qasaqana qorlaý deregi boiynsha quqyqtyq baǵa beriletin bolady", – dep habarlady politsiia.
Quqyq qorǵaý organdary atalǵan istiń baqylaýda ekenin jáne protsessýaldyq sheshim zań talaptaryna sáikes qabyldanatynyn málimdedi.
