Oblys basshysy Talǵar aýdanynda bolǵanda QR Prezidenti Ákimshiliginiń kelisimimen Talǵar aýdanynyń ákimi laýazymyna Jolan Omarovty usyndy. Óz kezeginde jańa ákimniń kandidatýrasyn aýdandyq máslihat depýtattary biraýyzdan qoldady. Depýtattarmen kezdesýden keiin oblys ákimi A.Batalov aýdan aktivimen júzdesti.
Kezdesýde oblys basshysy Talǵar aýdanynyń asa aýqymdy óńir ekenin, sheshimin kútken birqatar máseleleri de bar ekenin atap ótti.
Sonymen qatar oblys basshysy aýdanda atqarylǵan birqatar isterge toqtalyp ótti. Onyń aitýynsha, ákimdiktiń usynysymen, Úkimettiń qoldaýymen joǵarǵy Talǵar trassasyn jańǵyrtý jumystary jýyrda bastalady. Sol siiaqty aýdandaǵy ortalyqtandyrylǵan jylý júiesine qosylmaǵan kóp qabatty úilerdi jylý júiesine qosý isi qarqyndy jalǵastyrylatynyn da tilge tiek etti. Oblys ákimi Jolan Omarovtyń jumysyna sáttilik tilep, biznestiń damýyna, ónerkásipti órkendetýge qoldaý tanytýdy tapsyrdy.
Almaty oblysy ákimi Amandyq Batalov jumys saparymen Panfilov aýdanynda bolǵan sátinde aýdandy basqarǵan Temirlan Bektasovtyń basqa jumysqa aýysýyna bailanysty Jarkent óńirine jańa basshy taǵaiyndaý úshin oblys ákimi aldymen máslihat depýtattarymen kezdesip, Prezident Ákimshiliginiń kelisimimen atalǵan laýazymǵa Talǵat Ómirálievti usynatynyn jetkizdi. Ózara pikirlesýden keiin depýtattar usynysty qoldaityndaryn aityp, biraýyzdan daýys bergen soń oblys ákimi taǵaiyndaý týraly óz ókimine qol qoidy.
Munan soń Amandyq Batalov aýdan aktivimen jiyn ótkizdi.
– Búgin óńirdegi kadrlyq ózgeristerge qatysty Panfilov aýdanyna arnaiy kelip otyrmyn. Temirlan Bektasov az ýaqyttyń ishinde nátijeli jumys istedi. Temirlandai kadrdyń iskerlik qabileti oblys ákiminiń apparatyna jetekshilik etýge qajet bolǵandyqtan, oblys ortalyǵyna alyp, Talǵat Ómirálievtei bilikti azamatty osy óńirge ákelip otyrmyn. Panfilov – shekaralyq aýdan. Uly Jibek Jolynyń shyǵys qaqpasy sanalady. Damý múmkindigi, aldaǵy perspektivasy zor óńir. Elbasynyń tikelei qoldaýymen bul aýdannyń damýyna zor yqpal etetin aýqymdy jumystar jasaldy. «Jetigen-Qorǵas» joly tóseldi, «Qorǵas – Shyǵys qaqpasy» ekonomikalyq aimaǵy, «Qorǵas» HShYO, Altynkól stansasy salynyp, jumys isteýde, infraqurylym jaqsartylyp, investitsiia tartylýda. Bul baǵytta jańa Prezidenttiń de aldymyzǵa qoiyp otyrǵan mindetteri zor. Sondyqtan bul aýdandy basqarýǵa tájiribesi mol, iskerligi myǵym azamat qajet bolǵandyqtan Talǵat Ómirálievke úlken mindet júkteledi. El azamattarymen keńesip, kópshiliktiń pikirimen sanasyp, halyqtyń ishinde júrý kerek. Osyndai jaýapty jumysta el seniminen shyǵyp, jaqsy jumys isteidi dep senemin, – dedi A. Batalov.
Budan soń T.Bektasov pen T.Ómiráliev te kezekpen sóz alyp, rizashylyqtaryn jetkizip, senim údesinen shyǵýǵa ýáde berdi.
Osy jiynda Sotsialistik Eńbek Eri Kúlásh Aitjanova, «Ernar» sharýa qojalyǵynyń basshysy Tasqan Japarqul jáne basqa da azamattar T.Bektasovqa aq jol, jańa kelgen ákimniń jumysyna sáttilik tilep, qai isti de birlesip atqarysýǵa ázir ekendikterin aitty.
Almaty oblysy ákiminiń baspasóz qyzmeti
