Oblys basshysy Talǵar aýdanynda bolǵanda QR Prezıdenti Ákimshiliginiń kelisimimen Talǵar aýdanynyń ákimi laýazymyna Jolan Omarovty usyndy. Óz kezeginde jańa ákimniń kandıdatýrasyn aýdandyq máslıhat depýtattary biraýyzdan qoldady. Depýtattarmen kezdesýden keıin oblys ákimi A.Batalov aýdan aktıvimen júzdesti.
Kezdesýde oblys basshysy Talǵar aýdanynyń asa aýqymdy óńir ekenin, sheshimin kútken birqatar máseleleri de bar ekenin atap ótti.
– Talǵar aýdanynda 280 myńdaı halyq turady. Turǵyndary eńbekker, kásipkerlikke beıim úlken aýdandy basqarýdyń artyqshylyǵy da, qıynshylyǵy da bar. Qala mańyndaǵy eldi mekenderdiń áleýmettik máseleleri erekshe nazar aýdarýdy talap etedi. Mundaǵy jer máselesine de jiti qaraý kerek. Kez kelgen is jyldam sheshim qabyldap, sońyna deıin sapaly atqarǵanda ǵana túbegeıli sheshiledi. Sondyqtan biz aýdanǵa qashanda zor qoldaý kórsetip kelemiz. Máselen, sońǵy 5 jylda Talǵar aýdanyna 37 mlrd. teńge qarjy bólingen. Ryskeldi Ahmetqalıuly qolynan kelgenshe aýdandy damytýǵa úles qosty. Sol úshin oblys basshylyǵynyń, aýdan turǵyndarynyń atynan rahmet aıtamyn. Ryskeldi Satbaevtyń tájirıbesi mol, ortalyq organdarda, Qaraǵandy oblysynda, Almaty qalasynda jaýapty qyzmetter atqarǵan. Sondyqtan osy bilimi men tájirıbesin, potensıalyn oblysty damytýǵa áli de baǵyttaıtyn bolady. Al buǵan deıin Raıymbek aýdanyn basqarǵan Jolan Omarovtyń Talǵar aýdanyn basqarýǵa kúsh-jigeri, kásibı múmkindigi jetedi dep oılaımyn. Bul óńirdegi jylýmen, sýmen, gazben qamtý, sý tasqynynyń aldyn alý, ásirese, áleýmettik jáne jer máselelerine kóp kóńil bólý qajet. Turǵyndardyń aryz-ótinishterinde kótergen problemalaryn sheshý aldyńǵy qatarda turýy tıis, – dedi A.Batalov.
Sonymen qatar oblys basshysy aýdanda atqarylǵan birqatar isterge toqtalyp ótti. Onyń aıtýynsha, ákimdiktiń usynysymen, Úkimettiń qoldaýymen joǵarǵy Talǵar trassasyn jańǵyrtý jumystary jýyrda bastalady. Sol sıaqty aýdandaǵy ortalyqtandyrylǵan jylý júıesine qosylmaǵan kóp qabatty úılerdi jylý júıesine qosý isi qarqyndy jalǵastyrylatynyn da tilge tıek etti. Oblys ákimi Jolan Omarovtyń jumysyna sáttilik tilep, bıznestiń damýyna, ónerkásipti órkendetýge qoldaý tanytýdy tapsyrdy.
Almaty oblysy ákimi Amandyq Batalov jumys saparymen Panfılov aýdanynda bolǵan sátinde aýdandy basqarǵan Temirlan Bektasovtyń basqa jumysqa aýysýyna baılanysty Jarkent óńirine jańa basshy taǵaıyndaý úshin oblys ákimi aldymen máslıhat depýtattarymen kezdesip, Prezıdent Ákimshiliginiń kelisimimen atalǵan laýazymǵa Talǵat Ómirálıevti usynatynyn jetkizdi. Ózara pikirlesýden keıin depýtattar usynysty qoldaıtyndaryn aıtyp, biraýyzdan daýys bergen soń oblys ákimi taǵaıyndaý týraly óz ókimine qol qoıdy.
Munan soń Amandyq Batalov aýdan aktıvimen jıyn ótkizdi.
– Búgin óńirdegi kadrlyq ózgeristerge qatysty Panfılov aýdanyna arnaıy kelip otyrmyn. Temirlan Bektasov az ýaqyttyń ishinde nátıjeli jumys istedi. Temirlandaı kadrdyń iskerlik qabileti oblys ákiminiń apparatyna jetekshilik etýge qajet bolǵandyqtan, oblys ortalyǵyna alyp, Talǵat Ómirálıevteı bilikti azamatty osy óńirge ákelip otyrmyn. Panfılov – shekaralyq aýdan. Uly Jibek Jolynyń shyǵys qaqpasy sanalady. Damý múmkindigi, aldaǵy perspektıvasy zor óńir. Elbasynyń tikeleı qoldaýymen bul aýdannyń damýyna zor yqpal etetin aýqymdy jumystar jasaldy. «Jetigen-Qorǵas» joly tóseldi, «Qorǵas – Shyǵys qaqpasy» ekonomıkalyq aımaǵy, «Qorǵas» HSHYO, Altynkól stansasy salynyp, jumys isteýde, ınfraqurylym jaqsartylyp, ınvestısıa tartylýda. Bul baǵytta jańa Prezıdenttiń de aldymyzǵa qoıyp otyrǵan mindetteri zor. Sondyqtan bul aýdandy basqarýǵa tájirıbesi mol, iskerligi myǵym azamat qajet bolǵandyqtan Talǵat Ómirálıevke úlken mindet júkteledi. El azamattarymen keńesip, kópshiliktiń pikirimen sanasyp, halyqtyń ishinde júrý kerek. Osyndaı jaýapty jumysta el seniminen shyǵyp, jaqsy jumys isteıdi dep senemin, – dedi A. Batalov.
Budan soń T.Bektasov pen T.Ómirálıev te kezekpen sóz alyp, rızashylyqtaryn jetkizip, senim údesinen shyǵýǵa ýáde berdi.
Osy jıynda Sosıalısik Eńbek Eri Kúlásh Aıtjanova, «Ernar» sharýa qojalyǵynyń basshysy Tasqan Japarqul jáne basqa da azamattar T.Bektasovqa aq jol, jańa kelgen ákimniń jumysyna sáttilik tilep, qaı isti de birlesip atqarysýǵa ázir ekendikterin aıtty.
Almaty oblysy ákiminiń baspasóz qyzmeti
