وبلىس باسشىسى تالعار اۋدانىندا بولعاندا ق ر پرەزيدەنتى اكىمشىلىگىنىڭ كەلىسىمىمەن تالعار اۋدانىنىڭ اكىمى لاۋازىمىنا جولان وماروۆتى ۇسىندى. ءوز كەزەگىندە جاڭا اكىمنىڭ كانديداتۋراسىن اۋداندىق ءماسليحات دەپۋتاتتارى ءبىراۋىزدان قولدادى. دەپۋتاتتارمەن كەزدەسۋدەن كەيىن وبلىس اكىمى ا.باتالوۆ اۋدان اكتيۆىمەن جۇزدەستى.
كەزدەسۋدە وبلىس باسشىسى تالعار اۋدانىنىڭ اسا اۋقىمدى ءوڭىر ەكەنىن، شەشىمىن كۇتكەن ءبىرقاتار ماسەلەلەرى دە بار ەكەنىن اتاپ ءوتتى.
– تالعار اۋدانىندا 280 مىڭداي حالىق تۇرادى. تۇرعىندارى ەڭبەككەر، كاسىپكەرلىككە بەيىم ۇلكەن اۋداندى باسقارۋدىڭ ارتىقشىلىعى دا، قيىنشىلىعى دا بار. قالا ماڭىنداعى ەلدى مەكەندەردىڭ الەۋمەتتىك ماسەلەلەرى ەرەكشە نازار اۋدارۋدى تالاپ ەتەدى. مۇنداعى جەر ماسەلەسىنە دە ءجىتى قاراۋ كەرەك. كەز كەلگەن ءىس جىلدام شەشىم قابىلداپ، سوڭىنا دەيىن ساپالى اتقارعاندا عانا تۇبەگەيلى شەشىلەدى. سوندىقتان ءبىز اۋدانعا قاشاندا زور قولداۋ كورسەتىپ كەلەمىز. ماسەلەن، سوڭعى 5 جىلدا تالعار اۋدانىنا 37 ملرد. تەڭگە قارجى بولىنگەن. رىسكەلدى احمەتقالي ۇلى قولىنان كەلگەنشە اۋداندى دامىتۋعا ۇلەس قوستى. سول ءۇشىن وبلىس باسشىلىعىنىڭ، اۋدان تۇرعىندارىنىڭ اتىنان راحمەت ايتامىن. رىسكەلدى ساتبايەۆتىڭ تاجىريبەسى مول، ورتالىق ورگانداردا، قاراعاندى وبلىسىندا، الماتى قالاسىندا جاۋاپتى قىزمەتتەر اتقارعان. سوندىقتان وسى ءبىلىمى مەن تاجىريبەسىن، پوتەنسيالىن وبلىستى دامىتۋعا ءالى دە باعىتتايتىن بولادى. ال بۇعان دەيىن رايىمبەك اۋدانىن باسقارعان جولان وماروۆتىڭ تالعار اۋدانىن باسقارۋعا كۇش-جىگەرى، كاسىبي مۇمكىندىگى جەتەدى دەپ ويلايمىن. بۇل وڭىردەگى جىلۋمەن، سۋمەن، گازبەن قامتۋ، سۋ تاسقىنىنىڭ الدىن الۋ، اسىرەسە، الەۋمەتتىك جانە جەر ماسەلەلەرىنە كوپ كوڭىل ءبولۋ قاجەت. تۇرعىنداردىڭ ارىز-وتىنىشتەرىندە كوتەرگەن پروبلەمالارىن شەشۋ الدىڭعى قاتاردا تۇرۋى ءتيىس، – دەدى ا.باتالوۆ.
سونىمەن قاتار وبلىس باسشىسى اۋداندا اتقارىلعان ءبىرقاتار ىستەرگە توقتالىپ ءوتتى. ونىڭ ايتۋىنشا، اكىمدىكتىڭ ۇسىنىسىمەن، ۇكىمەتتىڭ قولداۋىمەن جوعارعى تالعار تراسساسىن جاڭعىرتۋ جۇمىستارى جۋىردا باستالادى. سول سياقتى اۋدانداعى ورتالىقتاندىرىلعان جىلۋ جۇيەسىنە قوسىلماعان كوپ قاباتتى ۇيلەردى جىلۋ جۇيەسىنە قوسۋ ءىسى قارقىندى جالعاستىرىلاتىنىن دا تىلگە تيەك ەتتى. وبلىس اكىمى جولان وماروۆتىڭ جۇمىسىنا ساتتىلىك تىلەپ، بيزنەستىڭ دامۋىنا، ونەركاسىپتى وركەندەتۋگە قولداۋ تانىتۋدى تاپسىردى.
الماتى وبلىسى اكىمى اماندىق باتالوۆ جۇمىس ساپارىمەن پانفيلوۆ اۋدانىندا بولعان ساتىندە اۋداندى باسقارعان تەمىرلان بەكتاسوۆتىڭ باسقا جۇمىسقا اۋىسۋىنا بايلانىستى جاركەنت وڭىرىنە جاڭا باسشى تاعايىنداۋ ءۇشىن وبلىس اكىمى الدىمەن ءماسليحات دەپۋتاتتارىمەن كەزدەسىپ، پرەزيدەنت اكىمشىلىگىنىڭ كەلىسىمىمەن اتالعان لاۋازىمعا تالعات ومىرالييەۆتى ۇسىناتىنىن جەتكىزدى. ءوزارا پىكىرلەسۋدەن كەيىن دەپۋتاتتار ۇسىنىستى قولدايتىندارىن ايتىپ، ءبىراۋىزدان داۋىس بەرگەن سوڭ وبلىس اكىمى تاعايىنداۋ تۋرالى ءوز وكىمىنە قول قويدى.
مۇنان سوڭ اماندىق باتالوۆ اۋدان اكتيۆىمەن جيىن وتكىزدى.
– بۇگىن وڭىردەگى كادرلىق وزگەرىستەرگە قاتىستى پانفيلوۆ اۋدانىنا ارنايى كەلىپ وتىرمىن. تەمىرلان بەكتاسوۆ از ۋاقىتتىڭ ىشىندە ناتيجەلى جۇمىس ىستەدى. تەمىرلانداي كادردىڭ ىسكەرلىك قابىلەتى وبلىس اكىمىنىڭ اپپاراتىنا جەتەكشىلىك ەتۋگە قاجەت بولعاندىقتان، وبلىس ورتالىعىنا الىپ، تالعات ومىرالييەۆتەي بىلىكتى ازاماتتى وسى وڭىرگە اكەلىپ وتىرمىن. پانفيلوۆ – شەكارالىق اۋدان. ۇلى جىبەك جولىنىڭ شىعىس قاقپاسى سانالادى. دامۋ مۇمكىندىگى، الداعى پەرسپەكتيۆاسى زور ءوڭىر. ەلباسىنىڭ تىكەلەي قولداۋىمەن بۇل اۋداننىڭ دامۋىنا زور ىقپال ەتەتىن اۋقىمدى جۇمىستار جاسالدى. «جەتىگەن-قورعاس» جولى توسەلدى، «قورعاس – شىعىس قاقپاسى» ەكونوميكالىق ايماعى، «قورعاس» حشىو، التىنكول ستانساسى سالىنىپ، جۇمىس ىستەۋدە، ينفراقۇرىلىم جاقسارتىلىپ، ينۆەستيسيا تارتىلۋدا. بۇل باعىتتا جاڭا پرەزيدەنتتىڭ دە الدىمىزعا قويىپ وتىرعان مىندەتتەرى زور. سوندىقتان بۇل اۋداندى باسقارۋعا تاجىريبەسى مول، ىسكەرلىگى مىعىم ازامات قاجەت بولعاندىقتان تالعات ومىرالييەۆكە ۇلكەن مىندەت جۇكتەلەدى. ەل ازاماتتارىمەن كەڭەسىپ، كوپشىلىكتىڭ پىكىرىمەن ساناسىپ، حالىقتىڭ ىشىندە ءجۇرۋ كەرەك. وسىنداي جاۋاپتى جۇمىستا ەل سەنىمىنەن شىعىپ، جاقسى جۇمىس ىستەيدى دەپ سەنەمىن، – دەدى ا. باتالوۆ.
بۇدان سوڭ ت.بەكتاسوۆ پەن ت.ومىرالييەۆ تە كەزەكپەن ءسوز الىپ، ريزاشىلىقتارىن جەتكىزىپ، سەنىم ۇدەسىنەن شىعۋعا ۋادە بەردى.
وسى جيىندا سوسياليستىك ەڭبەك ەرى كۇلاش ايتجانوۆا، «ەرنار» شارۋا قوجالىعىنىڭ باسشىسى تاسقان جاپارقۇل جانە باسقا دا ازاماتتار ت.بەكتاسوۆقا اق جول، جاڭا كەلگەن اكىمنىڭ جۇمىسىنا ساتتىلىك تىلەپ، قاي ءىستى دە بىرلەسىپ اتقارىسۋعا ءازىر ەكەندىكتەرىن ايتتى.
الماتى وبلىسى اكىمىنىڭ باسپا ءسوز قىزمەتى
