Búgin «AMANAT» partıasynyń Atqarýshy hatshysy Ashat Oralov elordada turatyn ardagerlerdiń úıine bardy. Olardyń arasynda Polsha, Rýmynıa jáne Vengrıany azat etý úshin bolǵan soǵysqa qatysqan 98 jastaǵy Rzaǵul Baıkeshev, Berlınge jetken 96 jastaǵy Júnispek Kárimov jáne maıdanǵa óz erkimen attanyp, Jeńis kúnin Býdapeshtte qarsy alǵan 97 jastaǵy Raısa Safonıcheva bar.
– Men soǵysqa 1941 jyly 7 tamyz kúni 17 jasymda attandym. 101-shi brıgadanyń quramynda boldym. Bizdi 4-5 aı oqytyp, birden maıdanǵa jiberdi. Jasymyzdyń kishiligine qaramastan, árqaısymyz Otan úshin jan berýge daıyn boldyq, – dedi Rzaǵul Baıkeshev.
Ashat Orlov 9 mamyr maıdangerler men tyl eńbekkerleriniń tarıhı erligi úshin maqtanysh pen shynaıy qurmet kórsetetin mereke bolyp qala beretinin atap ótti.
– Ardagerlerimizdiń uly erligin árbir qazaqstandyq qurmettep, este saqtaýy kerek. Bizge ashyq aspan, beıbit ómir syılaǵan ardagerlerimizdiń esimderin eshqashan umytpaımyz. Qarttarǵa qamqorlyq kórsetý – bizdiń ortaq paryzymyz. Olarǵa qoldaý bildirý árqashan «AMANAT» partıasynyń basty nazarynda bolady. Maıdanǵa 1,2 mıllıonnan astam qazaqstandyq attanyp, onyń jartysy úılerine oralmady. 9 mamyr – ardagerlerimizdiń tarıhı erligi úshin maqtanysh jáne shynaıy qurmet kúni bolyp qala beredi, – dep atap ótti ol.
Aıta keteıik, «Ardagerlerdi ardaqtaıyq» jobasy aıasynda medısınalyq-áleýmettik mekemelerde turatyn qarttardyń ómir súrý jaǵdaıyna monıtorıń júrgizý jalǵasýda. Elimiz boıynsha 45 belsendi uzaq ómir súrý ortalyǵy ashylyp, onda 60 myńnan astam qarıa bos ýaqytyn ótkizedi. Qarttardyń áleýmettik-turmystyq jaǵdaıyna baılanysty 300 myńnan astam másele sheshimin taýyp, 275 myń adamǵa ataýly kómek kórsetildi.
