Pavlodar oblysynyń Aqtoǵai aýdanyndaǵy Aqtogai Milk sút fermasynda alty jumysshynyń qaza tabýyna bailanysty kásiporyn resmi málimdeme jariialady. Aita keteiik, bul fermanyń máslihat depýtaty Aleksandr Terentevke tiesili ekeni belgili boldy, dep habarlaidy dalanews.kz.
Kompaniianyń málimetinshe, kásiporyn aýmaǵynda bolǵan jazataiym oqiǵa saldarynan alty qyzmetker kóz jumǵan. Sondai-aq zardap shekken taǵy bir jumysshy Aqtoǵai aýdandyq ortalyq aýrýhanasyna jetkizilgen. Qazir oǵan qajetti meditsinalyq kómek kórsetilip jatyr.
Aqtogai Milk JShS-niń basshylyǵy men ujymy qaza bolǵandardyń týǵan-týystary men jaqyndaryna qaiǵyryp kóńil aityp, olardyń otbasylaryna barlyq qajetti kómek pen qoldaý kórsetiletinin málimdedi.
Kompaniia oqiǵaǵa bailanysty quzyrly memlekettik organdar tergeý júrgizip jatqanyn habarlady. Sondai-aq kásiporyn tergeý jumystaryna tolyqtai qoldaý kórsetip, onyń qorytyndysy boiynsha qabyldanatyn barlyq qajetti sharalardy oryndaýǵa daiyn ekenin jetkizdi.
Eske salaiyq, buǵan deiin Pavlodar oblysynyń Aqtoǵai aýdanyndaǵy Jolaman aýylynda ornalasqan Aqtogai Milk JShS aýmaǵynda káriz qudyǵyndaǵy elektr sorǵysynyń aqaýyn jóndeý kezinde alty jumysshy qaza taýyp, taǵy bir adam aýrýhanaǵa jetkizilgeni habarlanǵan. Qaza bolǵandardyń biri kámeletke tolmaǵan jasóspirim bolǵan. Áleýmettik jelilerde kóz jumǵandardyń arasynda bir otbasynyń úsh múshesi – ákesi men eki uly bolǵany týraly aqparat taraǵanymen, bul málimet ázirge resmi túrde rastalǵan joq.
