Altynbektiń ólimi? FBR osy qylmysty zerttep, nátıjesin Qazaqstanǵa tapsyrǵan

Altynbektiń ólimi? FBR osy qylmysty zerttep, nátıjesin Qazaqstanǵa tapsyrǵan - Jaqıanov

Kórkem Aldabergenova 12 aqp. 2024 15:02 12531

Saıasatker Ǵalymjan Jaqıanov marqum Altynbek Sársenbaıulynyń ólimine qatysty shyndyq nege ashylmaı jatqanyn aıtty, - dep habarlaıdy Dalanews.kz.

Jaqıanov Altynbek Sársenbaıulynyń ólimine qatysty shyndyq áli kúnge deıin ashylmaǵanyn aıtty.

"Keshe Altekeńniń qaza bolǵanyna 18 jyl toldy. Áli kúnge deıin shyndyq ashylmady, tarıhı ádilet ornamady. Aqorda isti qaıta tergeýge talpynyp otyrǵan joq. Qoǵam men zıaly qaýym tarapynan, medıada bılikke isti qaıta qaraý týraly talap qoıý baıqalmaıdy. Dese de Azattyq radıosy "Altynbekti kim atty?", "Kim attyrdy?" degen suraqqa jaýap izdeý umtylysyn turaqty jasap keledi. Sol talpynysty Azattyq redaksıasy bıyl da jasady. Jýrnalıs Manas Qaıyrtaıulymen Altynbek Sársenbaıulynyń ólimine qatysty jaıttardy jaqynda talqylaǵan edik.

Suhbatta ózime málim faktilerdi aıttym. Eksklúzıv dáıek te aıtyldy.

2013 jyly Boston qalasynda AQSH federaldyq tergeý búrosy (FBI) agentterimen kezdeskenmin. Altynbektiń qazasy jaıly áńgime bolǵan. Sol kezdesýden túıgenim – "FBR" osy qylmysty jan-jaqty zerttep, nátıjesin Qazaqstanǵa tapsyrǵan.

Al elimizdiń ne eski, ne jańa basshylary áli kúnge deıin ol tergeýdiń qorytyndysy jaıly tis jarmaı otyr", - deıdi Jaqıanov.

Foto: Facebook

Ol Altynbek Sársenbaıuly ádiletsiz saıası júıege qarsy turǵanyn atap ótti.

"Altekeń avtorıtarlyq bılik elimizdiń kósegesin kógertpeıtinin jaqsy bildi. Sol úshin de ádiletsiz saıası júıege qarsy turdy. Sol jolda sheıit boldy. Qazirgi jaǵdaıda Nazarbaev tusyndaǵy saıası ólimderdi qaıta qaramaı, Altekeńniń atyn mektepke berip, Zákeńe (Zamanbek Nurqadilov) eskertkish turǵyzyp, olardyń táýelsiz Qazaqstan tarıhyndaǵy ornyna ádiletti baǵa berilýi múmkin emes. Shyndyqty biletin kýágerler faktini aıtýdan áli de qorqady. Bul Qazaqstandaǵy avtorıtarlyq júıeniń ózgerissiz qalǵanyn kórsetedi. Elde shynaıy saıası ózgeris bolǵan kezde ǵana Zákeń men Altekeńe baılanysty qylmystar ashylyp quqyqtyq, saıası jáne tarıhı baǵa beriledi. Sonda ǵana ádilettikke jol ashyldy dep aıta alamyz. Ondaı zaman azamattyq qoǵamnyń belsendi qatysýynsyz kelýi múmkin emes", - deıdi Ǵalymjan Jaqıanov.

Aıta keteıik, 2006 jyly 11 aqpanda tanymal saıasatker, opozısıa jetekshisi Altynbek Sársenbaev pen onyń eki kómekshisi – Vasılıı Jýravlev pen Baýyrjan Baıbosyndy urlap áketken. Eki kúnnen keıin, 13 aqpanda, olardyń atylǵan deneleri Almaty mańyndaǵy taýlardan tabyldy.

Eske salaıyq, buǵan deıin Altynbek Sársenbaıulyn ustap áketken "Arystan" jasaǵynyń komandıri Edil Ábikenov jaǵdaıdyń qalaı bolǵanyn aıtyp bergen. Ol 2006 jyly 11 aqpanda saıasatker Altynbek Sársenbaıulyn ustaý kezinde eshqandaı kúsh qoldanylmaǵanyn aıtady.

Edil Ábikenov osy oqıǵadan keıin 5 áriptesimen birge sottalǵan, ózi túrmede 12 jyl otyryp shyqty. Sondaı-aq ol Altynbek Sársebaıulynyń isine qatysty aıtylmaǵan dúnıeler áli de kóp ekenin jáne jaqyn ýaqytta ol ashyq jarıa bolmaıtynyn jetkizdi.