Ulytaý oblysynyń burynǵy ákimi, qazirgi Ulttyq mýzei direktory Berik Ábdiǵaliuly “Ýáde” baǵdarlamasyna bergen suhbatynda ózi basqarǵan óńirdiń problemalary, qarjy tabýdyń mashaqaty, shendilerdiń synǵa tózimdiligi, jemqorlyqpen kúres jáne ózine "ultshyl" degen aiyptyń qalai taǵylǵanyn búkpesiz baiandady. Sonymen qatar Altynbek Sársenbaiulynyń qazasy saiasi ómirine qalai áser etkeni jaily da sóz qozǵady, dep habarlaidy Dalanews.kz.
Ol Ulytaý oblysyn basqarǵan eki jyl ishinde óńirde sheshilýi tiis ózekti máseleler bolǵanyn atap ótti.
“Birinshi kezekte oblysta kóptegen problema boldy. Bul máseleler oblys qurylǵanda Memleket basshysymen kezdeskende de kóterildi. Eń aldymen Jezqazǵan qalasyndaǵy aýyz sý tapshylyǵy, ekinshiden, halyq jii kóterip júrgen ekologiialyq jaǵdai boldy. Sonymen qatar joldardyń jaǵdaiy da ózekti edi. Osy problemalarǵa qatysty tiisti tapsyrmalar berildi. Oblystyń qurylýdaǵy negizgi maqsaty – osy túitkilderdi sheshý bolatyn”, – dedi ol “Ýáde” baǵdarlamasyna bergen suhbatynda.
Berik Ábdiǵaliulynyń aitýynsha, ákim bolyp kelgen sátten bastap, óńirde keshendi jospar qabyldanǵan. Bul jospar Úkimet tarapynan maquldanyp, qarjylandyrýǵa qajetti qujattar daiyndala bastaǵan.
“Bir jyldan asa ýaqyt osy qujattardy daiyndaýǵa ketti. Sebebi qarajat alý úshin smetalyq jáne zertteý qujattaryn ázirleý qajet. Halyqtyń kózine kórinip turǵanymen, qarjy tabý ońai emes. Negizgi bir jarym jyldai ýaqyt osyǵan jumsaldy. Qazir keibir jobalar qarjylandyrylyp, jumystar júrip jatyr”, – dedi eks-ákim.
Ol sondai-aq qarajat alýdyń nege qiyn ekenine de toqtaldy.
“Jańadan qurylǵan oblystarǵa Prezidenttiń tapsyrmasy bolǵannan keiin Úkimet qoldaý kórsetti. Biraq eń bastysy – tiisti qujattardy ýaqytynda daiyndaý. Bir smetalyq qujattyń ózine bir jyldai ýaqyt ketedi. Sebebi konkýrs ótkiziledi, ekspertiza jasalady. Oblys jazda qurylǵanymen, biz kúzde basqarmalardy tolyq quryp, jobalardy 2022 jyldyń sońynan bastap ázirledik. 2023 jyldyń biýdjetine endi ǵana daiyn bola bastadyq”, – dedi Ábdiǵaliuly.
Onyń sózinshe, burynǵy oblystarda qujattar birneshe jyl buryn josparlanyp qoiady, al jańadan qurylǵan óńirde munyń bári nólden bastalǵan.
“Sondyqtan alǵashqy kezde qujattardy qurý protsesinde biraz tejeldik. Qazir jobalardyń birqatary maquldanyp, jumystar júrip jatyr”, – dedi ol.
Berik Ábdiǵaliuly Ulytaý oblysy ákimdiginen ketý sebebin de túsindirdi.
“Jańa qyzmetke aýystym. Basshylyqpen kezdesken kezde men bul nietimdi bildirdim. Eki jyl tórt aidai jumys istep, Memleket basshysy kelse, esebimdi berip, keiin ǵylymi jumysqa aýyssam degen oiym bar ekenin aittym. Biraq Ulttyq mýzeige kelemin dep oilamadym. Men ol jerde buryn eki jyldai jumys istegenmin. Bir jarym jyl “Qasietti Qazaqstan” jobasyn atqardym. Sony eskerip, osy qyzmetti usyndy dep oilaimyn. Keiin konkýrs uiymdastyrylyp, onyń nátijesi boiynsha resmi túrde taǵaiyndaldym”, – dedi sheneýnik.
Ol qyzmetten ketýine qoǵamdaǵy synnyń esh qatysy joq ekenin naqty aitty.
“Biz syndy jii estimiz. Áriptesterim, ákimder – bári kýá. Birde birinshi orynda bolamyz, birde tómendeimiz. Ákimder syndy kóterýi kerek. Memlekettik qyzmetker, ministr bolsyn, qandai soqqy bolsa da kótere bilýi kerek. Eger sheshe almasa, óz erkimen aryz jazyp ketkeni jón. Syndy kóterip, qorytyndy shyǵarý – árbir saiasi qyzmetkerdiń jaýapkershiligi. Men jumystan qashqan joqpyn, ári qarai jumys isteýge daiyn boldym. Biraq usynys bolǵan soń, bardym”, – dedi Ábdiǵaliuly.
Ol kezinde bilikti qatty synaǵanyn, tipti “eshqashan memlekettik qyzmetke kelmeimin” dep ketken kezi bolǵanyn eske aldy.
“Eski Qazaqstandy synadym. Qaraǵandy oblysy ákiminiń orynbasary bolǵan kezimde de sol sebepti qyzmetten kettim. Burynǵy Prezidentti de synadym. Ásirese, Altynbek Sársenbaiulyn atyp óltirgen kezde synym kúsheie tústi. Sebebi ol meniń ustazym edi. Sol oqiǵa meni qatty kúizeltti. Biraq keiin jigitter shaqyryp, birge jumys isteýdi usyndy. Men de: “Jaraidy, saiasatqa aralastyrmaiyq, mádeni-ǵylymi jobalarmen ainalysaiyn”, – dedim. Sóitip qaitadan jumysqa kiristim. Oblys ákimdiginen ketken soń úsh jyl jumyssyz júrdim. Tipti “jumyssyz” retinde tirkelip qoiaiyn ba dep te oiladym. Sosyn “qolymnan ne keledi?” dep ózime suraq qoidym. Ǵylymmen jolymdy bastaǵan adam bolǵan soń, osy baǵytqa qaita oraldym. “Alashorda áskeri” taqyryby meni burynnan mazalap júrgen. Sol taqyrypqa kiristim. Úsh jylda kitabymdy aiaqtadym”, – dedi ol.
Sheneýnik “Eski Qazaqstan” tusynda ózin kimder qýdalaǵanyn da ashyp aitty.
“Ol kezde Prezident Ákimshiliginde Mailybaev Baǵlan boldy. Solar bastady. Maǵan ǵana emes, saiasi minberde júrgen basqa azamattardy da “ultshyl” dep aiyptady. Estýimshe, Erlan Tynybaiulyna, Aidos Sarymǵa, tipti Marat Tájinge de qysym jasaldy. Máskeýge barǵanymda Marat Tájin, Berik Ýáli kómek kórsetti. Aidos Sarym Baýyrjan Ospan esimdi kásipkermen tanystyrdy. Ol kisi de: “Kitapta meniń de atalarym bar eken”, – dep, kitaptyń shyǵýyna kómektesti”, – dedi Ábdiǵaliuly.
Sondai-aq ol jemqorlyqpen kúres jónindegi oiyn da ortaǵa saldy.
“Maǵan jeke ózime para usynǵan adamdar bolmady. Biraq jeke jobalar júrip jatqanda ártúrli azamattar kelip, “myna tenderge qatyssaq” deidi. Biz ondaida bári zań aiasynda sheshiledi dep aitamyz. Sonymen qatar Antikordyń aldyn ala eskertetin kezderi de bolady. “Osyndai azamat sizge keledi, biz ony ustaimyz” deidi. Ondai jaǵdailar meniń tájiribemde boldy.
Qytaida jemqorlardy atyp tastaidy. Bizge de sondai bir tártip kerek shyǵar dep oilaimyn. Birinshi – úrei bolýy kerek. Sheneýnik qoryqpasa, ala beredi. Ekinshi – ar-ojdan. Mysaly, grýzinderde osy ekeýi qatar júredi. Jemqorlyq barlyq elde bar. Biraq bizde ol qalypty jaǵdaiǵa ainalyp ketti. Sondyqtan aldymen parany alýdy emes, berýdi toqtatý kerek. Sonda, múmkin, bul másele sheshile bastaidy", – dedi Berik Ábdiǵaliuly.
