Qazaqstandyq kásipker jáne saiasatker Bolat Ábilov Altynbek Sársenbaiulynyń ólimi týraly qaraly habar qalai jetkenin aityp berdi, - dep habarlaidy Dalanews.kz.
Bul týraly Ábilov jýrnalist Vadim Boreikoǵa bergen suhbatynda aitty.
"Biz tańerteń, ádettegidei keńsede kezdestik. Orazáli Jandosov, Tólegen Júkeev jáne men. Alteke men Oraz jaqyn turatyn, men shetelde bolyp, kelgen kezim. 11 aqpanda keshke ushyp kelýim kerek edi. Bagajymdy joǵaltyp, dostarymmen boldym. Úige keldik. Altynbek jumysta bolǵan, oǵan deiin men shetelde bolǵan kezde birneshe ret sóileskenbiz. Altynbektiń kóńil kúii "sýper" edi.
Qandai da bir qaiǵyly oqiǵa bolady degen nárse oiymyzǵa da kelmedi. Ol "Bolat, sen demalyp júrsiń, biz azannan keshke deiin keńsede jumys istep jatyrmyz" dep ázildeitin. 11 aqpan - senbi, kún jańbyrly edi. Ol maǵan "Biz jumysta bolamyz, keshki 7-8-de keshki as isheiik" dedi. "Jaqsy" dedim, biraq týystarymmen otyrǵandyqtan "Alteke, qazir ornymnan turyp, ketip qala almaimyn" dedim. Kelesi kúni jaiaý taýǵa shyǵyp kelýdi josparlap otyrǵanbyz nemese dúisenbi keńsede kezdesermiz dedik. Alteke jaqsy dedi. Osylai kelistik.
Dúisenbi keńsege keldik, Altynbekke habarlassaq telefony sóndirýli boldy. Oqqaǵary Baýyrjanǵa habarlassaq ol da sóndirýli. Ne bolyp jatqanyn túsinbedik. Júrgizýshige Altynbektiń úiine baryp kel dedik, múmkin bir nárse bolyp qalǵan shyǵar dep oiladyq. Júrgizýshi baryp kelgen soń kólik joǵyn aitty. Sol kúni qalyń qar jaýyp turǵan edi. Júrgizýshi tipti eshqandai iz de joǵyn aitty. Birnárse bolyp qaldy ma dep ýaiymdai bastadyq. Biraq túske deiin kúteiik dedik. Tús ýaqyty bolǵan kezde "KTK" telearnasy Altynbek Sársenbaev ańshylyqqa shyqqan kezde Almaty taýlarynda óltirilgenin habarlady. Osyndai jaman habar keldi. Ne isterimizdi bilmei, abdyrap qaldyq. Kinoda júrgendei boldyq", - deidi Ábilov.
Sonymen qatar, Bolat Ábilov Altynbek Sársenbaiuly óli tabylǵan jerde ne bolǵanyn aityp bergen.
"Ol jerdi áreń taptyq. Politsiia bizdi ótkizbedi. Eshkimdi ótkizbedi. Bárine habarlasa bastadym. Al Nazarbaev ol kezde Izrailde resmi saparda júrgen. Sol kezdegi prezident apparatynyń basshysy Ádilbek Jaqsybekovke habarlastym, Ádilbek ol prezidentpen júrgenin, olardyń túk qatysy joq ekenin aityp, ózderiń sheshińder dedi. Bolat Ótemuratovqa habarlassam ol da sondai jaýap aitty. Marat Tájinge habarlastym, ol kele almaitynyn aitty. Baýyrjan Muhamedjanovqa habarlastym (sol kezdegi Ishki ister ministri), ol iá, ainalysyp jatyrmyz dedi. 15-20 minýttan keiin biz máiit jatqan jerge bardyq.
(...) Biz kelgende Altynbek qara pakette jatty. Bizge ony ashyp kórsetti. Altynbek kip-kishkentai, azyp ketken. Jaqynda ǵana emen-jarqyn sóilesip, qýanyp otyrǵanymyzda, endi osylai qara pakette jatyr. Sál ary Vasilii men Baýyrjan (eki kómekshisi) óńimen tómen jatyr. Arqalarynda atqan qarýdyń izi boldy. Qoldary artqa qaiyrylyp, plastik qysqyshpen bailanyp jatyr. Altynbek jatqan jer qurǵaq boldy. Olardy óltirý týraly buiryq bolǵan", - deidi Bolat Ábilov.
