قازاقستاندىق كاسىپكەر جانە ساياساتكەر بولات ءابىلوۆ التىنبەك سارسەنباي ۇلىنىڭ ءولىمى تۋرالى قارالى حابار قالاي جەتكەنىن ايتىپ بەردى، - دەپ حابارلايدى Dalanews.kz.
بۇل تۋرالى ءابىلوۆ جۋرناليست ۆاديم بورەيكوعا بەرگەن سۇحباتىندا ايتتى.
"ءبىز تاڭەرتەڭ، ادەتتەگىدەي كەڭسەدە كەزدەستىك. ءورازالى جاندوسوۆ، تولەگەن جۇكەيەۆ جانە مەن. التەكە مەن وراز جاقىن تۇراتىن، مەن شەتەلدە بولىپ، كەلگەن كەزىم. 11 اقپاندا كەشكە ۇشىپ كەلۋىم كەرەك ەدى. باگاجىمدى جوعالتىپ، دوستارىممەن بولدىم. ۇيگە كەلدىك. التىنبەك جۇمىستا بولعان، وعان دەيىن مەن شەتەلدە بولعان كەزدە بىرنەشە رەت سويلەسكەنبىز. التىنبەكتىڭ كوڭىل كۇيى "سۋپەر" ەدى.
قانداي دا ءبىر قايعىلى وقيعا بولادى دەگەن نارسە ويىمىزعا دا كەلمەدى. ول "بولات، سەن دەمالىپ ءجۇرسىڭ، ءبىز ازاننان كەشكە دەيىن كەڭسەدە جۇمىس ىستەپ جاتىرمىز" دەپ ازىلدەيتىن. 11 اقپان - سەنبى، كۇن جاڭبىرلى ەدى. ول ماعان "ءبىز جۇمىستا بولامىز، كەشكى 7-8-دە كەشكى اس ىشەيىك" دەدى. "جاقسى" دەدىم، ءبىراق تۋىستارىممەن وتىرعاندىقتان "التەكە، ءقازىر ورنىمنان تۇرىپ، كەتىپ قالا المايمىن" دەدىم. كەلەسى كۇنى جاياۋ تاۋعا شىعىپ كەلۋدى جوسپارلاپ وتىرعانبىز نەمەسە دۇيسەنبى كەڭسەدە كەزدەسەرمىز دەدىك. التەكە جاقسى دەدى. وسىلاي كەلىستىك.
دۇيسەنبى كەڭسەگە كەلدىك، التىنبەككە حابارلاسساق تەلەفونى ءسوندىرۋلى بولدى. وققاعارى باۋىرجانعا حابارلاسساق ول دا ءسوندىرۋلى. نە بولىپ جاتقانىن تۇسىنبەدىك. جۇرگىزۋشىگە التىنبەكتىڭ ۇيىنە بارىپ كەل دەدىك، مۇمكىن ءبىر نارسە بولىپ قالعان شىعار دەپ ويلادىق. جۇرگىزۋشى بارىپ كەلگەن سوڭ كولىك جوعىن ايتتى. سول كۇنى قالىڭ قار جاۋىپ تۇرعان ەدى. جۇرگىزۋشى ءتىپتى ەشقانداي ءىز دە جوعىن ايتتى. بىرنارسە بولىپ قالدى ما دەپ ۋايىمداي باستادىق. ءبىراق تۇسكە دەيىن كۇتەيىك دەدىك. ءتۇس ۋاقىتى بولعان كەزدە "كتك" تەلەارناسى التىنبەك سارسەنبايەۆ اڭشىلىققا شىققان كەزدە الماتى تاۋلارىندا ولتىرىلگەنىن حابارلادى. وسىنداي جامان حابار كەلدى. نە ىستەرىمىزدى بىلمەي، ابدىراپ قالدىق. كينودا جۇرگەندەي بولدىق"، - دەيدى ءابىلوۆ.
سونىمەن قاتار، بولات ءابىلوۆ التىنبەك سارسەنباي ۇلى ءولى تابىلعان جەردە نە بولعانىن ايتىپ بەرگەن.
"ول جەردى ارەڭ تاپتىق. پوليسيا ءبىزدى وتكىزبەدى. ەشكىمدى وتكىزبەدى. بارىنە حابارلاسا باستادىم. ال نازاربايەۆ ول كەزدە يزرايلدە رەسمي ساپاردا جۇرگەن. سول كەزدەگى پرەزيدەنت اپپاراتىنىڭ باسشىسى ادىلبەك جاقسىبەكوۆكە حابارلاستىم، ادىلبەك ول پرەزيدەنتپەن جۇرگەنىن، ولاردىڭ تۇك قاتىسى جوق ەكەنىن ايتىپ، وزدەرىڭ شەشىڭدەر دەدى. بولات وتەمۇراتوۆقا حابارلاسسام ول دا سونداي جاۋاپ ايتتى. مارات تاجينگە حابارلاستىم، ول كەلە المايتىنىن ايتتى. باۋىرجان مۇحامەدجانوۆقا حابارلاستىم (سول كەزدەگى ىشكى ىستەر ءمينيسترى)، ول ءيا، اينالىسىپ جاتىرمىز دەدى. 15-20 مينۋتتان كەيىن ءبىز ءمايىت جاتقان جەرگە باردىق.
(...) ءبىز كەلگەندە التىنبەك قارا پاكەتتە جاتتى. بىزگە ونى اشىپ كورسەتتى. التىنبەك كىپ-كىشكەنتاي، ازىپ كەتكەن. جاقىندا عانا ەمەن-جارقىن سويلەسىپ، قۋانىپ وتىرعانىمىزدا، ەندى وسىلاي قارا پاكەتتە جاتىر. ءسال ارى ۆاسيليي مەن باۋىرجان (ەكى كومەكشىسى) وڭىمەن تومەن جاتىر. ارقالارىندا اتقان قارۋدىڭ ءىزى بولدى. قولدارى ارتقا قايىرىلىپ، پلاستيك قىسقىشپەن بايلانىپ جاتىر. التىنبەك جاتقان جەر قۇرعاق بولدى. ولاردى ءولتىرۋ تۋرالى بۇيرىق بولعان"، - دەيدى بولات ءابىلوۆ.
