– Qurmetti elorda turǵyndary men qonaqtary! Sizderdi Astana kúnimen quttyqtaımyn! Elordamyzdyń damýy qalanyń árbir turǵynyna baılanysty, árqaısysyńyz osy ortaq iske óz úlesińizdi qosa alasyz.
Bas qalamyz áli de jaıly, yńǵaıly bola túsýi úshin birqatar júıeli problemalardyń sheshimin tabý jolynda jumys júrip jatyr. Atap aıtqanda, ınjenerlik jáne jol ınfraqurylymyn júrgizý, áleýmettik jáne sporttyq nysandar salý, eldi mekenderdi damytý, aýdandardy abattandyrý jumysy.
Shilde aıy bastalǵaly beri qalamyzda konsertten bastap sport festıvaline deıingi ondaǵan josparly is-sharalar ótip jatyr.
Elorda kúninde sonymen qatar áleýmettik máselelerge erekshe kóńil bólinip, turǵyn úı kezegin kútkenderge, jumys isteıtin jastarǵa, úleskerlerge páter kilti tabystalyp jatyr. Sol sıaqty birqatar áleýmettik nysandardyń, 100-den astam aýla men qoǵamdyq keńistiktiń (saıabaqtar, gúlzarlar, jelekjoldar) qurylysy aıaqtalýǵa jaqyn, ındýstrıalyq parkte eki zaýyt iske qosylsa, kúrdeli jóndeýden keıin «Alash» kópiri ashyldy.
Barshańyzdy elordamyzdyń tól merekesimen shyn júrekten quttyqtap, árbirińizge myqty densaýlyq, otbasy amandyǵyn jáne tolaǵaı tabystar tileımin! – dedi Altaı Kólginov.
Foto: Aleksandr Kýprıenko
