Qazirgi tańda Nur-Sultan qalasynyń aýmaǵynda 16 jeke sektorly eldi meken bar. Onyń birazy Tselinograd kezinen kele jatqan, al qalǵandary jańadan qosylǵan eldi mekender ekeni belgili. Bul másele jaiynda qala ákimi bylai dedi:
– Elbasymyz Nursultan Nazarbaev jyldyń basynda elimizdegi iri úsh qala – Nur-Sultan, Almaty, Shymkentti damytýǵa qatysty memleket qazynasynan 90 mlrd teńge bólýdi tapsyrǵan bolatyn. Sol tapsyrmaǵa sáikes biyl bizge 7,5 mlrd teńge bólindi.
Ákimdik qyzmetkerleri 16 eldi mekenniń barlyǵyn taldap, onda 280 myńnan astam halyq turatynyn anyqtady.
Ol bizdiń qala turǵyndarynyń 25 paiyzyn quraidy. Úkimetpen birge osy máselemen ainalysyp jatyrmyz. Bizde elordany damytýdyń keshendi jospary bar, keshendi jospar 5 jyldyq. Onda eń ózekti máselelerdiń bári qamtylǵan, – dedi qala basshysy.
Altai Kólginov Nur-Sultan qalasy mańyndaǵy eldi mekenderdi damytý jospary iske asyrý barysynda barlyq eldi mekenderdi aralap, turǵyndarmen kezdesipti.
– Biz turǵyndarmen kezdesýden keiin qala mańyndaǵy eldi mekenderdegi máselelerdi 3 blokqa bólip sheshýdiń mańyzy zor ekenine kóz jetkizdik. Birinshisi – infraqurylymdyq máseleler, ol injenerlik jeliler men joldar. Ekinshisi – áleýmettik nysandar. Ol bilim berý nysandary, mektep, balabaqsha nemese dárigerlik ambýlatoriia, sport nysandary. Úshinshi blok – abattandyrý. Oǵan trotýar, saiabaq, jaryqtandyrý, aialdamalar iaǵni adam ómiriniń sapasyn arttyrýǵa baǵyttalǵan mańyzdy suraqtar qamtylǵan. Sonyń bárin blokqa bólgen kezde birqatar máselelerdi biz josparǵa bekittik. Birinshi kezdesýden keiin jinaǵan suraqtardyń jiyntyǵyn qarap, taldap shyqqan kezde 270 mlrd teńge qajet. Bul máselelerdiń bári bir jylda sheshilmeidi. Sondyqtan biz turǵyndarǵa aittyq «birinshi kezekte sizderdi ne mazalaidy, sony aityńyzdar» dep. «Biýdjetti halyqpen birge talqylaimyz» dep aityp jatyrmyz ǵoi, solai biz turǵyndardyń suranysyn zerttedik. Úshjyldyq biýdjet jospary búgin Úkimette bekitildi, – dedi.
