Atyraýda Jangeldin aýylyndaǵy bir otbasynyń ólimine qatysty is boiynsha aldyn ala sot otyrysy ótip jatyr. Tengrinews.kz tilshileri sot zalynda bolyp, istiń alǵashqy málimetterin jariialady, dep habarlaidy dalanews.kz.
Otyrys barysynda prokýror Miras Baýyrjanov aiyptaý aktisin oqydy. Onda sottalýshy Sultan Sársemalievtiń burynǵy jubaiynyń týǵan aǵasy Naýryz Muqanǵalievtiń qazasyna alyp kelgen janjaldyń mán-jaiy baiandalǵan.
"Ol qandai da bir sebeptermen balalardyń sottalýshynyń ata-anasynyń úiine jetkizilip, is júzinde sol jerde turyp jatqany týraly másele kóterýge tyrysqan. Óz kezeginde Sársemaliev Muqanǵaliev Naýryzǵa qalada turyp jatqan kezeńde balalarǵa jáne Muqanǵalievaǵa óz betinshe qarai almaitynyn aitqannan keiin, olardyń arasynda kelispeýshilik bastalǵan", – delingen aiyptaý aktisinde.
Aiyptaý tarapynyń málimetinshe, janjal sheshilmegen. Osydan keiin Muqanǵaliev máseleni jeke sóilesip sheshý úshin qalaǵa keletinin aitqan.
2025 jylǵy 14 mamyrda ol Atyraýǵa kelip, Sársemalievpen bailanysqa shyqqan. Ekeýi Beibarys dańǵyly boiynda ornalasqan temirjol vokzalynda kezdesken. Sol jerde olar aradaǵy kelispeýshilikti qaita talqylaǵanymen, ortaq sheshimge kele almaǵan.
"Sársemaliev Muqanǵaliev Naýryzǵa aýylǵa túpkilikti kóshpegenin, otbasynyń jeke zattary men kiimderi ýaqytsha jaldamaly páterde turǵanyn, sondai-aq qaitadan Atyraýǵa kóshý jospary bar ekenin túsindirgen", – dep oqydy prokýror.
Tergeý dereginshe, Sársemaliev qarsylasyna bul jaǵdaiǵa ózi kóz jetkizý úshin atalǵan úige barýdy usynǵan. Muqanǵaliev kelisip, ekeýi birge sol mekenjaiǵa barǵan.
Úidiń ishinde er adamdar zalǵa kirip, janjaldy talqylaýdy jalǵastyrǵan. Alaida bul joly da kelisimge kele almaǵan. Sóz talasy keiin tóbeleske ulasqan.
"Janjal barysynda Sársemaliev óziniń Muqanǵaliev Naýryzdan fizikalyq turǵydan álsiz ekenin jáne oǵan laiyqty qarsylyq kórsete almaitynyn túsinip, qasaqana kisi óltirý týraly sheshim qabyldaǵan", – delingen aiyptaý aktisinde.
Budan keiin, aiyptaý nusqasyna sáikes, ol asúige baryp, pyshaq alǵan. Artynsha tóbeles kezinde Muqanǵalievtiń ish tusyna birneshe ret pyshaq suqqan.
Alǵan jaraqattarynan Naýryz Muqanǵaliev oqiǵa ornynda kóz jumǵan.
Is materialdaryna sáikes, sodan keiin Sársemaliev qylmystyń izin jasyrýǵa tyrysqan. Marqumnyń denesi jeke úidiń aýlasyna jasyrylyp, yqtimal aiǵaqtardy joiýǵa áreket jasalǵan.
