Belgili koých, sarapshy Roza Áshirbaeva Qýandyq Bishimbaevtyń sottaǵy málimdemeleri men advokattaryna qatysty pikir bildirdi, - dep habarlaidy Dalanews.kz.
Áshirbaevanyń sózinshe, qazirgi tańda sotqa qatysty aqparattyq shabýyldar bastalǵan.
«Bishimbaevtyń advokattary «Biz qalai qorǵanamyz?» dep talqylaǵan kezde, olardyń bar oiyna kelgeni osy. Iaǵni Saltanatty barynsha jaman kórsetsek, onda jaza retinde az merzim beriledi degen oiǵa kelgen. Stsenariidi solai qurǵan. Saltanattyń ózin kináli qylyp shyqpaq.
Bishimbaevtyń advokattary ne úshin bulai istep otyr? Sebebi Qazaqstanda 20 million adam bolsa, onyń 10 milliony er adam. Statistika boiynsha, er adamdar memlekettik qyzmette, basshylyq qyzmette, azamattyq belsendi adamdar. Al er adamdardyń kóbi kúieýi áielin ursa demek áiel ózi kináli, tilden tapty dep oilaidy. Advokattar ádeii osy taqyrypqa burmalap ákele jatyr. Sebebi «Saltanattyń ózi sondai, jeńiltek, ashýlana beredi» degen aiyptaýlar áleýmettik jelige tarap ketse, artynda Bishimbaev búkil er azamattarǵa úndeý jasap jatyr degen sóz. Er azamattarǵa signal jasap jatyr. Quqyq qorǵaý organdarynda kóbine jumys isteitin er adamdar, alqabilerdiń beseýi er adam. Sondyqtan Bishimbaev jazasyn óteý merzimin azaitý úshin aianbai ádiletsiz túrde Saltanat pen onyń otbasyn qaralap jatyr», - deidi sarapshy.
Sonymen qatar, Roza Áshirbaevanyń sózinshe, Bishimbaev Saltanat ekeýiniń arasynda ǵana bolǵan dáleli joq jaǵdaidy ádeii aitqan.
"Saltanattyń emotsiiasy aýysa beredi, men oǵan dári berdim" degen nárselerdi aitady. Oǵan dálel joq. Ony joqqa shyǵaratyn bir adam ǵana - Saltanat. Aýzyna kelgenin aityp jatyr", - deidi Áshirbaeva.
Aita keteiik, buǵan deiin belgili zańger Erjan Esimhanov "Bishimbaev isi" eldegi sot júiesiniń qandai kúide ekenin áshkerelep bergen bolatyn.
Aita keteiik, áleýmettik jelide qazaqstandyqtar sýdia, prokýror men advokattardyń dórekiligine narazy bolǵan. Zańgerdiń sózinshe,olardyń ózin ustaýyna tańǵalýdyń qajeti joq.
«Bul búkil el onlain kórýge múmkindik alǵan aýqymdy protsess, sondyqtan kásibi mamandar da, qatysy joq adamdar da protseske qatysty pikir bildirýge tyrysyp jatyr. Olardyń kóbi protsess qalai órbip jatqanyna narazy. Prokýrorlar selqos, aiyptalýshynyń advokattary dóreki, sýdia protsesti baqylaýda ustamai otyr deidi. Sondyqtan adamdarda protsess baqylaýda tur, sheshim belgili, ádildik bolmaidy degendei oi qalyptasqandai bolǵan.
Bul qalypty nárse, árkim óz oiyn aitýǵa quqyly. Biraq bir niýans bar. Muny buǵan deiin sot protsesterine qatysqan adam túsinedi. Olardyń ózin bulai ustaýy jańalyq emes, olar ózin únemi osylai ustaidy. Únemi. Prokýrorlar selqos. Bir tujyrymdy qaitalai beredi. Zańgerler olar ne úshin bir nárseni qaitalai beretinin túsinedi, aiyptaýshy taraptyń belgili bir protsedýralyq mindeti bar, olar sol tapsyrmany oryndaýy kerek», - deidi zańger.
Erjan Esimhanovtyń sózinshe, advokattardyń ózin dóreki ustaýy da qalypty nárse.
Aita keteiik, 1 sáýirde ótken sot otyrysynda Qýandyq Bishimbaev Saltanat Núkenovamen qarym-qatynasy týraly óz nusqasyn aitqan bolatyn. Sonymen qatar, Bishimbaev sotta Saltanattyń jeke ómirindegi burynǵy jaittar týraly da aitty.
Odan bólek, Bishimbaev iske qatysty aqparattar burmalanǵanyn málimdedi.
Endigi sot otyrysy 3 sáýirde 10.00-de bolady.
27 naýryzda eks-ministr Qýandyq Bishimbaevtyń isi boiynsha alqabiler tańdalǵan edi. Alqabiler alqasyna 12 adam irikteldi: 10 – negizgi quram, 2 – qosalqy. Sodan keiin ashyq sot otyrystary bastaldy.
Keiin Qýandyq Bishimbaev sotta Saltanat Núkenovany asa qatygezdikpen óltirgenin moiyndamady.
Bul oqiǵa 2023 jyly 9 qarashada Astana qalasyndaǵy BAU meiramhanasynda boldy.
