Sońǵy jańalyqtarǵa úńiletin bolsaq, Pavlodar oblysynda Toyota Alphard markaly kóliktiń qatysýymen qaiǵyly apat nátijesinde eki jolaýshy qaza taýyp, júrgizýshi túrli dene jaraqattarymen aýrýhanaǵa jetkizildi. Aita ketetin bolsaq, jaqyn arada osy kólik markasymen Almaty oblysynda da Toyota Alphard kóligi qatysqan jantúrgisherlik jol apaty oryn aldy. Onyń saldarynan da adam ólimderi tirkelgen edi, dep habarlaidy Dalanews.kz.
Pavlodar oblysy Politsiia departamentiniń resmi Instagram paraqshasynda habarlanǵandai, aldyn ala málimet boiynsha, 2 qazan kúni Pavlodar – Qyzylorda avtojolynyń 17 shaqyrymynda, Atameken aýylynyń mańynda Toyota Alphard kóliginiń júrgizýshisi qaýipsiz qozǵalys jyldamdyǵyn saqtamaǵan. Sonyń saldarynan ol jolǵa kenetten shyqqan jylqyny soǵyp, kólik kiývetke aýdarylyp ketken.
Apat ornynda eki jolaýshy qaza tapty, al júrgizýshi túrli dene jaraqattarymen aýrýhanaǵa jetkizildi.
Atalǵan fakti boiynsha politsiia qylmystyq is qozǵady.
Sońǵy jyldary Qazaqstanda oń róldi kólikter, sonyń ishinde Toyota Alphard markaly minivender jolaýshylar tasymalynda jii qoldanyla bastady. Alaida bul kólikterdiń qatysýymen oryn alatyn jol- kólik oqiǵalarynyń sany kóbeiip barady. Osyndai oqiǵalardan keiin qoǵamda oń róldi kólikterdiń qaýipsizdigi jaily kóptegen pikirtalastar paida bolady.
Oń ról - oń sheshim be?
Qazaqstan joldarynyń infraqurylymy sol róldi kólikterge beiimdelgen. Iaǵni, jol belgileri, baǵdarshamdar, ainalma joldar men solǵa búrylatyn jolaqtar- bári júrgizýshi sol jaqta otyryp ońai baqylaý jasai alatyndai etip jobalanǵan. Al oń róldi kólikterdiń júrgizýshileri qarsy baǵyttaǵy kólikti kórýde, ozý nemese solǵa burylý kezinde eleýli qiyndyqtarǵa tap bolady.
Mundai kóliktermen júretin júrgizýshiler úshin jolda qaýip- qater deńgeii joǵary. Jol apaty bolǵan jaǵdaida jolaýshylar da, júrgizýshi de úlken qaýipke ushyraidy.Onyń ústine Toyota Alphard siiaqty keń salondy, jolaýshy tasymalyna beiimdelgen kólikter kóbine taksi nemese zańsyz tasymaldaý qyzmetinde paidalanylady, bul da olardyń júktemesin arttyrady.
Toyota Alphard- ishki naryqqa arnalǵan, Japoniiada shyǵarylǵan biznes- klasstaǵy miniven. Jaily ári keń bolýy ony jolaýshy tasymalyna yńǵaily etedi. Alaida bul kólik Qazaqstan joldarynyń talaptaryna tolyq sai kele me degen suraq týyndaidy.
Kóp jaǵdaida mundai kólikterdiń tehnikalyq jaǵdaiy tiisti deńgeide tekserilmeidi, al júrgizýshiler arnaiy daiyndyqtan ótpei, jolaýshy tasymalymen ainalysa beredi. Bul jol- kólik oqiǵasyna ákep soqtyratyn negizgi sebepterdiń biri.
Qazaqstan Respýblikasynyń Bas prokýratýrasy janyndaǵy Quqyqtyq statistika jáne arnaiy esepke alý komitetiniń resmi aqparattyq portalynyń málimetine sáikes, elimizde jol- kólik oqiǵalarynyń sany jyldan jylǵa tómendemei otyr.
Atalǵan resýrsta jariialanǵan derekterge súiensek, eseptik kezeńde respýblika boiynsha barlyǵy 26 327 jol apaty tirkelgen. Onyń ishinde 1318 jaǵdai adam ólimimen aiaqtalǵan, bul jalpy apattardyń 5,01 paiyzyn qurap otyr.
Qazaqstan óńirlerindegi jol apattarynyń statistikasy: Almaty kósh bastap tur
JKO- nyń eń kóp tirkelgen óńiri- Almaty qalasy. Munda osy kúnge deiin 5794 jol apaty tirkelip, bul eldegi barlyq apattarynyń 22 paiyzyn qurap otyr. Adamdar sanynyń tyǵyzdyǵy, kólik qozǵalysynyń qarqyndylyǵy jáne júrgizýshilerdiń jol erejesin jii buzýy- apattardyń jiileýine áser etetin negizgi faktorlar sanalady.
Aldyńǵy qatarly óńirler:
Almatydan keiingi oryndarda:
Almaty oblysy- 2632 JKO (10%)
Astana qalasy- 1532 JKO (6%)
Jambyl oblysy- 1516 JKO (6%)
Aqtóbe oblysy – 1473 JKO (6%)
Atyraý oblysy – 1333 JKO (5%)
Shymkent qalasy – 1308 JKO (5%)
Qarapaiym taksiler: jailylyq pa, álde jasyryn qaýip pe?
Sońǵy jyldary Qazaqstanda jolaýshylar tasymalynda, ásirese qalaaralyq baǵyttarda, oń róldi kólikter jáne t.b. markaly kólikter keńinen qoldanyla bastady. Biraq kóptegen tájiribeli jolaýshylar bul kólikterge bailanysty birqatar alańdatarlyq máselelerdi kóterip júr.
«Jol boiynda óz ómirińe alańdaisyń» - jolaýshynyń pikiri.
Pavlodar- Almaty baǵyty boiynshy jii júretin turǵyn Nurjan Áliev (aty-jóni ózgertilgen) qalaaralyq taksi týraly óz oiyn ashyq bildirdi:
«Basynda Alphard kóligine otyryp, jailylyq bolady dep oiladyq. Biraq jolǵa shyqqanda múlde basqa kóriniske tap bolasyń. Kólik júrgizýshileri kóp jaǵdaida jyldamdyqty asyryp, jol erejesine mán bermeidi. Eń soraqysy- bul kólikterdiń kóbisi oń róldi, al joldarymyz sol rólge arnalǵan. Ozý, burylý sátterinde óz ómiriń úshin qorqyp otyrasyń»,- deidi ol.
Onyń aitýynsha, keibir júrgizýshiler turaqty demalyssyz,táýliktep jolda júrip, sharshańqy kúide kólik basqarady.Bul - apatqa alyp keletin negizgi sebepterdiń biri.
Statistika- qurǵaq sandar ǵana emes, olardyń artynda adam ómiri men taǵdyry tur. Árbir jol apaty- tek kólik qaqtyǵysy emes, keide orny tolmas qaiǵy men aýyr saldardyń sebebi. Sondyqtan, ár júrgizýshi men jaiaý júrginshi jol erejelerin saqtaý arqyly qoǵamnyń qaýipsizdigine úles qosatynyn túsinýi kerek.
