سوڭعى جاڭالىقتارعا ۇڭىلەتىن بولساق، پاۆلودار وبلىسىندا Toyota Alphard ماركالى كولىكتىڭ قاتىسۋىمەن قايعىلى اپات ناتيجەسىندە ەكى جولاۋشى قازا تاۋىپ، جۇرگىزۋشى ءتۇرلى دەنە جاراقاتتارىمەن اۋرۋحاناعا جەتكىزىلدى. ايتا كەتەتىن بولساق، جاقىن ارادا وسى كولىك ماركاسىمەن الماتى وبلىسىندا دا Toyota Alphard كولىگى قاتىسقان جانتۇرگىشەرلىك جول اپاتى ورىن الدى. ونىڭ سالدارىنان دا ادام ولىمدەرى تىركەلگەن ەدى، دەپ حابارلايدى Dalanews.kz.
پاۆلودار وبلىسى پوليسيا دەپارتامەنتىنىڭ رەسمي Instagram پاراقشاسىندا حابارلانعانداي، الدىن الا مالىمەت بويىنشا، 2 قازان كۇنى پاۆلودار – قىزىلوردا اۆتوجولىنىڭ 17 شاقىرىمىندا، اتامەكەن اۋىلىنىڭ ماڭىندا Toyota Alphard كولىگىنىڭ جۇرگىزۋشىسى ءقاۋىپسىز قوزعالىس جىلدامدىعىن ساقتاماعان. سونىڭ سالدارىنان ول جولعا كەنەتتەن شىققان جىلقىنى سوعىپ، كولىك كيۋۆەتكە اۋدارىلىپ كەتكەن.
اپات ورنىندا ەكى جولاۋشى قازا تاپتى، ال جۇرگىزۋشى ءتۇرلى دەنە جاراقاتتارىمەن اۋرۋحاناعا جەتكىزىلدى.
اتالعان فاكتى بويىنشا پوليسيا قىلمىستىق ءىس قوزعادى.
سوڭعى جىلدارى قازاقستاندا وڭ ءرولدى كولىكتەر، سونىڭ ىشىندە Toyota Alphard ماركالى مينيۆەندەر جولاۋشىلار تاسىمالىندا ءجيى قولدانىلا باستادى. الايدا بۇل كولىكتەردىڭ قاتىسۋىمەن ورىن الاتىن جول- كولىك وقيعالارىنىڭ سانى كوبەيىپ بارادى. وسىنداي وقيعالاردان كەيىن قوعامدا وڭ ءرولدى كولىكتەردىڭ قاۋىپسىزدىگى جايلى كوپتەگەن پىكىرتالاستار پايدا بولادى.
وڭ ءرول - وڭ شەشىم بە؟
قازاقستان جولدارىنىڭ ينفراقۇرىلىمى سول ءرولدى كولىكتەرگە بەيىمدەلگەن. ياعني، جول بەلگىلەرى، باعدارشامدار، اينالما جولدار مەن سولعا ءبۇرىلاتىن جولاقتار- ءبارى جۇرگىزۋشى سول جاقتا وتىرىپ وڭاي باقىلاۋ جاساي الاتىنداي ەتىپ جوبالانعان. ال وڭ ءرولدى كولىكتەردىڭ جۇرگىزۋشىلەرى قارسى باعىتتاعى كولىكتى كورۋدە، وزۋ نەمەسە سولعا بۇرىلۋ كەزىندە ەلەۋلى قيىندىقتارعا تاپ بولادى.
مۇنداي كولىكتەرمەن جۇرەتىن جۇرگىزۋشىلەر ءۇشىن جولدا ءقاۋىپ- قاتەر دەڭگەيى جوعارى. جول اپاتى بولعان جاعدايدا جولاۋشىلار دا، جۇرگىزۋشى دە ۇلكەن قاۋىپكە ۇشىرايدى.ونىڭ ۇستىنە Toyota Alphard سياقتى كەڭ سالوندى، جولاۋشى تاسىمالىنا بەيىمدەلگەن كولىكتەر كوبىنە تاكسي نەمەسە زاڭسىز تاسىمالداۋ قىزمەتىندە پايدالانىلادى، بۇل دا ولاردىڭ جۇكتەمەسىن ارتتىرادى.
Toyota Alphard- ىشكى نارىققا ارنالعان، جاپونيادا شىعارىلعان بيزنەس- كلاسستاعى مينيۆەن. جايلى ءارى كەڭ بولۋى ونى جولاۋشى تاسىمالىنا ىڭعايلى ەتەدى. الايدا بۇل كولىك قازاقستان جولدارىنىڭ تالاپتارىنا تولىق ساي كەلە مە دەگەن سۇراق تۋىندايدى.
كوپ جاعدايدا مۇنداي كولىكتەردىڭ تەحنيكالىق جاعدايى ءتيىستى دەڭگەيدە تەكسەرىلمەيدى، ال جۇرگىزۋشىلەر ارنايى دايىندىقتان وتپەي، جولاۋشى تاسىمالىمەن اينالىسا بەرەدى. بۇل جول- كولىك وقيعاسىنا اكەپ سوقتىراتىن نەگىزگى سەبەپتەردىڭ ءبىرى.
قازاقستان رەسپۋبليكاسىنىڭ باس پروكۋراتۋراسى جانىنداعى قۇقىقتىق ستاتيستيكا جانە ارنايى ەسەپكە الۋ كوميتەتىنىڭ رەسمي اقپاراتتىق پورتالىنىڭ مالىمەتىنە سايكەس، ەلىمىزدە جول- كولىك وقيعالارىنىڭ سانى جىلدان جىلعا تومەندەمەي وتىر.
اتالعان رەسۋرستا جاريالانعان دەرەكتەرگە سۇيەنسەك، ەسەپتىك كەزەڭدە رەسپۋبليكا بويىنشا بارلىعى 26 327 جول اپاتى تىركەلگەن. ونىڭ ىشىندە 1318 جاعداي ادام ولىمىمەن اياقتالعان، بۇل جالپى اپاتتاردىڭ 5،01 پايىزىن قۇراپ وتىر.
قازاقستان وڭىرلەرىندەگى جول اپاتتارىنىڭ ستاتيستيكاسى: الماتى كءوش باستاپ تۇر
جكو- نىڭ ەڭ كوپ تىركەلگەن ءوڭىرى- الماتى قالاسى. مۇندا وسى كۇنگە دەيىن 5794 جول اپاتى تىركەلىپ، بۇل ەلدەگى بارلىق اپاتتارىنىڭ 22 پايىزىن قۇراپ وتىر. ادامدار سانىنىڭ تىعىزدىعى، كولىك قوزعالىسىنىڭ قارقىندىلىعى جانە جۇرگىزۋشىلەردىڭ جول ەرەجەسىن ءجيى بۇزۋى- اپاتتاردىڭ جيىلەۋىنە اسەر ەتەتىن نەگىزگى فاكتورلار سانالادى.
الدىڭعى قاتارلى وڭىرلەر:
الماتىدان كەيىنگى ورىنداردا:
الماتى وبلىسى- 2632 جكو (10%)
استانا قالاسى- 1532 جكو (6%)
جامبىل وبلىسى- 1516 جكو (6%)
اقتوبە وبلىسى – 1473 جكو (6%)
اتىراۋ وبلىسى – 1333 جكو (5%)
شىمكەنت قالاسى – 1308 جكو (5%)
قاراپايىم تاكسيلەر: جايلىلىق پا، الدە جاسىرىن ءقاۋىپ پە؟
سوڭعى جىلدارى قازاقستاندا جولاۋشىلار تاسىمالىندا، اسىرەسە قالاارالىق باعىتتاردا، وڭ ءرولدى كولىكتەر جانە ت.ب. ماركالى كولىكتەر كەڭىنەن قولدانىلا باستادى. ءبىراق كوپتەگەن تاجىريبەلى جولاۋشىلار بۇل كولىكتەرگە بايلانىستى ءبىرقاتار الاڭداتارلىق ماسەلەلەردى كوتەرىپ ءجۇر.
«جول بويىندا ءوز ومىرىڭە الاڭدايسىڭ» - جولاۋشىنىڭ پىكىرى.
پاۆلودار- الماتى باعىتى بويىنشى ءجيى جۇرەتىن تۇرعىن نۇرجان الييەۆ (ءاتى-جونى وزگەرتىلگەن) قالاارالىق تاكسي تۋرالى ءوز ويىن اشىق ءبىلدىردى:
«باسىندا Alphard كولىگىنە وتىرىپ، جايلىلىق بولادى دەپ ويلادىق. ءبىراق جولعا شىققاندا مۇلدە باسقا كورىنىسكە تاپ بولاسىڭ. كولىك جۇرگىزۋشىلەرى كوپ جاعدايدا جىلدامدىقتى اسىرىپ، جول ەرەجەسىنە ءمان بەرمەيدى. ەڭ سوراقىسى- بۇل كولىكتەردىڭ كوبىسى وڭ ءرولدى، ال جولدارىمىز سول رولگە ارنالعان. وزۋ، بۇرىلۋ ساتتەرىندە ءوز ءومىرىڭ ءۇشىن قورقىپ وتىراسىڭ»،- دەيدى ول.
ونىڭ ايتۋىنشا، كەيبىر جۇرگىزۋشىلەر تۇراقتى دەمالىسسىز،تاۋلىكتەپ جولدا ءجۇرىپ، شارشاڭقى كۇيدە كولىك باسقارادى.بۇل - اپاتقا الىپ كەلەتىن نەگىزگى سەبەپتەردىڭ ءبىرى.
ستاتيستيكا- قۇرعاق ساندار عانا ەمەس، ولاردىڭ ارتىندا ادام ءومىرى مەن تاعدىرى تۇر. ءاربىر جول اپاتى- تەك كولىك قاقتىعىسى ەمەس، كەيدە ورنى تولماس قايعى مەن اۋىر سالداردىڭ سەبەبى. سوندىقتان، ءار جۇرگىزۋشى مەن جاياۋ جۇرگىنشى جول ەرەجەلەرىن ساقتاۋ ارقىلى قوعامنىڭ قاۋىپسىزدىگىنە ۇلەس قوساتىنىن ءتۇسىنۋى كەرەك.
