«Energetikalyq jáne kommýnaldyq sektorlardy jańǵyrtý» ulttyq jobasy aiasynda Almaty qalasynda jylýmen jabdyqtaý salasyn jaqsartý maqsatynda iri joba qolǵa alyndy, dep habarlaidy dalanews.kz.
Joba aiasynda JEO-2-den Batys jylý keshenine deiingi jylý magistraliniń eskirgen qubyrlary tolyǵymen jańasyna aýystyrylyp, qaita jańartylady. Jobanyń jalpy quny shamamen 54 mlrd teńgeni quraidy. Jańǵyrtý jumystaryn «Almaty elektr stantsiialary» AQ iske asyrady.
JEO-2 – BJK jylý magistrali JEO-2-den BJK-ǵa qosymsha sý jiberedi jáne Almaty qalasynyń ortalyqtandyrylǵan jylýmen jabdyqtaý aimaǵyna jylý júktemesiniń berilýin qamtamasyz etedi.
Jylý magistraliniń jai-kúii men qaita jańartylýy (rekonstrýktsiialaý):
Paidalaný merzimi: DÝ-800 qubyry 1980 jyly, al DÝ-1000 qubyry 1984 jyly iske qosylǵan. Jylý magistrali «Almaty jylý júiesi» JShS-nen «AlES» AQ teńgerimine (balansyna) 2013 jyly berildi. Normativti qyzmet etý merzimi 25 jyl bolsa, bul jylý magistraliniń búgingi tańda paidalanylyp jatqanyna 40 jyldan asqan.
Tehnikalyq jaǵdaiy:
Nysanǵa tehnikalyq qyzmet kórsetý turaqty túrde júrgizilip turady. Jyl saiyn jylý magistralinde aǵymdaǵy jóndeý jáne aldyn alý (profilaktikalyq) sharalary ótkiziledi.
Tozý deńgeii:
2022-2025 jyldar aralyǵynda jylytý maýsymynda jylý magistralinde orta eseppen 45-ten astam zaqymdaný jaǵdaiy tirkeldi. Sondai-aq, jyl saiyn jylytý maýsymy aiaqtalǵannan keiin pavilondardaǵy diametri D 1000 bekitkish armatýralar jóndelip, tekseristen ótedi. Qazirgi kezge deiin bul ýchaskedegi qubyr 85% tozǵan.
Jóndeý jáne jańartý jumystary qalai júrip jatyr?
Qujattama: Qurylys-montajdaý jumystaryn júrgizýge, sondai-aq tehnikalyq jáne avtorlyq qadaǵalaý jasaýǵa sharttar jasaldy. Qurylys-montajdaý jumystaryn bastaý úshin ruqsat qujattary, dálirek aitqanda, jumystardyń bastalǵany týraly habarlama-talon alyndy.
Jumys merzimi:
Nysandy qaita jańartý jáne jóndeý jumystary bekitilgen kestege sai 2026 jyldyń sáýir aiynyń sońynda bastaldy. Qazirgi kezeńde qurylysqa qajetti materialdar jetkizilip jatyr. Sondai-aq qurylys-montajdaý jumystaryn júrgizý úshin qubyrlar kezeń-kezeńimen isten shyǵarylyp jatyr.
Jobany iske asyrý qashan aiaqtalady?
Jumystar bekitilgen kestege sáikes júrgizilýde. Jumystyń birinshi kezeńin 2026 jyldyń qazan aiynda aiaqtaý josparlanǵan.
Otandyq ónim úlesi:
Jumys barysynda qurylys materialdary, qubyr ónimderi, metall prokaty jáne elektr jabdyqtary qoldanylady. Bul rette otandyq óndiristen shyǵarylǵan materialdardyń úlesi 99%.
