Almatyda 18-22 mamyr aralyǵynda josparly elektr qýatyn óshirý jumystary júrgiziledi. Bul týraly "Alataý jaryq kompaniiasy" málimdedi, dep habarlaidy dalanews.kz.
Kompaniia taratqan aqparatqa sáikes, ýaqytsha shekteýler qaladaǵy birqatar shaǵynaýdan men turǵyn úi alaptaryn qamtidy. Atap aitqanda, Aigerim, Kókqainar, Shańyraq, Uljan, Aqjar, Taýsamaly, Qalqaman, Almagúl, Gornyi Gigant, Baǵanashyl, Nur Alataý, Kóktóbe jáne Aqsai shaǵynaýdandarynda jaryq ýaqytsha sóndirilýi múmkin.
Sonymen qatar Jandosov, Gagarin, Sátbaev, Áýezov, Jarokov, Raiymbek, Abylai han, Jeltoqsan, Tóle bi, Buqar jyraý kósheleri men Ál-Farabi dańǵylynyń jekelegen bólikterinde de elektr qýaty ýaqytsha ajyratylady.
Energetikterdiń málimetinshe, jumystardyń basym bóligi kúndizgi ýaqytta — tańǵy 08:00 ne 09:00-den keshki 17:00-ge deiin júrgiziledi.
Kompaniia ókilderi bul sharalar elektr jelilerin jańǵyrtý men júieniń turaqty jumysyn qamtamasyz etý maqsatynda qolǵa alynǵanyn atap ótti. Turǵyndarǵa aldyn ala qajetti qurylǵylaryn qýattap alyp, josparlaryn eskerip júrý usynyldy.
