Almatyda Baým toǵaiynda 19 jastaǵy qyzdyń ústine aǵash qulap, aýyr jaraqat aldy. Qazir ol komada jatyr, dep habarlaidy dalanews.kz 24.kz-ke siltep.
Oqiǵa 27 maýsymda saǵat 15:00 shamasynda bolǵan. Týystarynyń aitýynsha, qyz otbasymen birge serýendep júrgen kezde ústine úlken qýraǵan aǵash qulaǵan. Olardyń sózinshe, sol sátte qatty jel de, jańbyr da bolmaǵan.
Jaqyndarynyń málimetinshe, qyz altynshy kún qatarynan komada jatyr. Oǵan bas súieginiń aýyr jaraqaty, san súiegi synýy, aiaq synyǵy jáne basqa da kóptegen jaraqat diagnozy qoiylǵan. Dárigerler onyń ómiri úshin kúresip jatyr. Aýyr bas-mi jaraqatyna bailanysty mi isinýi qaýpi joǵary ekeni aitylǵan.
Týystary Baým toǵaiynda áli de qýraǵan ári qaýipti aǵashtar kóp ekenin aityp, quzyrly organdardy olardy tekserip, kesýge shaqyrdy.
Almaty ákimdigi bul derek boiynsha sotqa deiingi tergeý bastalǵanyn habarlady. Sondai-aq, toǵai aýmaǵynda aǵash qulaý qaýpi bar ekenin eskertetin arnaiy belgiler ornatylǵanyn málimdedi.
Ákimdik málimetinshe, Baým toǵaiy 1877 jyly qurylǵan. Aǵashtardyń 70 paiyzdan astamy tabiǵi qartaiý kezeńine jetkendikten, syrttai saý kórinetin aǵashtardyń ózi qulaýy múmkin.
