Halyqaralyq balalardy qorǵaý kúnine orai Almatyda «Almaty BALAFEST – 2026» qalalyq festivaliniń finaldyq kezeńi ótti. Merekelik is-sharaǵa qala ákimi Darhan Satybaldy qatysty, dep habarlaidy dalanews.kz.
Biylǵy festival mektep oqýshylarynyń tsifrlyq daǵdysyn damytýǵa, shyǵarmashylyq qabiletin shyńdaýǵa jáne erte kásibi baǵdar berýge arnaldy. Is-sharanyń negizgi alańy Áliia Moldaǵulova men Mánshúk Mámetova atyndaǵy memorialdyq saiabaqta uiymdastyrylyp, oǵan shamamen 5 myńǵa jýyq bala qatysty.
Qatysýshylar úshin jeti taqyryptyq aimaqtan turatyn bilim berý jáne oiyn-saýyq kvesti uiymdastyryldy. Oqýshylar robototehnika, ǵylymi zertteýler, mediakontent jasaý, sándik-qoldanbaly óner, kibersport jáne ekologiialyq jobalar baǵyttarymen tanysty.
Festival qonaqtaryna halyqaralyq jáne respýblikalyq olimpiadalar men baiqaýlardyń jeńimpazdary jetekshilik etti. Sonymen qatar tótenshe jaǵdai qyzmetteriniń tehnikasy tanystyrylyp, alǵashqy meditsinalyq kómek kórsetý boiynsha sheberdiń sabaqtary men kinologtardyń arnaiy kórsetilimderi ótti.
Festival aldynda mektepishilik, aýdandyq jáne qalalyq kezeńder uiymdastyrylyp, olar shyǵarmashylyq, sporttyq jáne ǵylymi-intellektýaldyq jeti baǵyt boiynsha ótkizildi. Jalpy baiqaý baǵdarlamasyna 240,7 myńnan astam oqýshy qatysyp, onyń 2 571-i qalalyq kezeńge joldama aldy.
Festival qorytyndysy boiynsha 1 335 jeńimpaz ben júldeger anyqtalyp, diplomdar jáne estelik syilyqtarmen marapattaldy. Olardyń qatarynda erekshe bilim berý qajettiligi bar balalar da bar.
Aita keteiik, «BALAFEST» festivali Almatyda 2022 jyldan beri ótkizilip keledi. Joba daryndy balalardy qoldaýǵa, jas urpaqtyń shyǵarmashylyq jáne ziiatkerlik áleýetin damytýǵa baǵyttalǵan.
