Almatyda avtoturaqtar qymbattaidy. Joba qalalyq máslihat sessiiasynda tanystyryldy, dep habarlaidy dalanews.kz.
Kommýnaldyq aqyly avtoturaqtardaǵy saǵatyna 100 teńge degen tarif 2016 jyldan beri ózgergen joq. Osy ýaqyt ishinde qaladaǵy kólik sany 1 millionnan asyp, jol-kólik infraqurylymyna túsetin júkteme artqan.
Almaty qalasy Jol qozǵalysy jáne jolaýshylar kóligin uiymdastyrý basqarmasynyń basshysy Erjan Dihanbaevtyń aitýynsha, biryńǵai tarif qalanyń ortalyq bóliginde jetkiliksiz bolyp otyr. Sonyń saldarynan júrgizýshiler bos oryn izdep, qosymsha júrýge májbúr bolady. Osy máseleni sheshý úshin avtoturaq tarifin aýmaqtaǵy kólik júktemesi men onyń ereksheligine qarai belgileý usynylǵan.
Joba boiynsha kólik júktemesi tómen ýchaskelerde saǵatyna 100 teńge degen tarif saqtalady. Júktemesi ortasha aýmaqtarda tarif 150 teńge, al kólik kóp júretin ári avtoturaq oryndary tapshy ýchaskelerde tarif 200 teńge bolady.
Alaida turǵyndarǵa arnalǵan jeńildik saqtalady. Aqyly avtoturaq mańynda turatyn turǵyn úi ieleri arnaiy ruqsat rásimdep, úiine jaqyn ornalasqan avtoturaqty tegin paidalana alady. Budan bólek, keibir sanattar úshin qoldanystaǵy jeńildikter de saqtalady.
