Almaty qalasynda aliment tóleýden uzaq ýaqyt boiy jaltarǵan er adam qylmystyq jaýapkershilikke tartyldy, dep habarlaidy dalanews.kz.
Qala prokýratýrasynyń málimetinshe, Túrksib aýdanynyń prokýratýrasy kámeletke tolmaǵan balasyn asyraýǵa arnalǵan alimentti tóleý týraly sot sheshimin er adamnyń alty jyldan astam ýaqyt oryndamaǵanyn anyqtaǵan.
Tekserý barysynda onyń aliment boiynsha bereshegi 5 million teńgeden asqany belgili boldy. Boryshkerge birneshe ret eskertý jasalyp, jumysqa ornalasý usynylǵanymen, ol odan bas tartqan. Sonymen qatar «Iandeks Taksi» servisinde jumys istep tapqan tabysyn aliment tóleýge jumsamai, jasyryp kelgen.
Buǵan deiin er adam aliment tólemegeni úshin ákimshilik jaýapkershilikke tartylǵan. Alaida ol sot sheshimin oryndaýdan ári qarai da jaltarýyn toqtatpaǵan.
Almaty qalasynyń Kámeletke tolmaǵandardyń isteri jónindegi mamandandyrylǵan aýdanaralyq soty ony QR Qylmystyq kodeksiniń 139-baby boiynsha kináli dep tanyp, bir jyl merzimge bas bostandyǵyn shekteý jazasyn taǵaiyndady.
Prokýratýranyń málimetinshe, búginde Almaty qalasynda aliment tóleýden jaltarý faktileri boiynsha Qylmystyq kodekstiń 139-babymen 38 sotqa deiingi tergep-tekserý júrgizilýde. Sonymen qatar 227 boryshker ákimshilik jaýapkershilikke tartylǵan.
Qadaǵalaý organy balany asyrap-baǵý árbir ata-ananyń zańmen belgilengen mindeti ekenin eske salyp, aliment tóleýden jaltarǵany úshin ákimshilik jáne qylmystyq jaýapkershilik qarastyrylǵanyn málimdedi.
