Shalkóde tórinde ótken Raiymbek aýdanynyń 90 jyldyq mereitoiyna arnalǵan «Hantáńiri qazynasy» halyqaralyq etnofestivali óz máresine jetti. Merekege Qazaqstannyń túkpir-túkpirinen jáne shetelderden kelgen 25 myńǵa jýyq qonaq qatysty. Shalkóde jailaýyna jinalǵan qaýym aýdannyń tereń tarihymen, agroónerkásiptik, týristik áleýetimen tereńirek tanysyp, tumsa tabiǵattyń tylsym syryna qanyqty. Ásirese «Jolan júirigi» respýblikalyq at báigesi halyqqa erekshe áser syilap, shara qorytyndysynda júzden júirik, myńnan tulpar shyqqandar marapattaldy, dep habarlaidy dalanews.kz.
«Jolan júiriginde» elimizdiń ár óńirinen jáne shetelderden kelgen tańdaýly shabandozdar baq synap, tartysty doda ótkizdi. Respýblikalyq alaman báigede Qordai aýdanynan qatysqan «Botagóz» tulpary (iesi – Nurbergen Aisultan) márege birinshi bolyp jetti. Top báigede «Jelsuly» sáigúligi (iesi – Nurseiit Jylqyshabai) topty jaryp, naǵyz júirik atandy. Qunan báigede Qordai aýdanynan kelgen «Qyzǵaldaq» tulpary (iesi – Dúiseǵul áýleti) jeńimpaz boldy. Atalǵan úzdikter «CHANGAN» jáne «KIA» markaly avtokólikteri men 2 million teńge qarjylai syilyqty jeńip aldy.
Jergilikti shabandozdarǵa arnalǵan aýdandyq báigeler de kórermenniń erekshe yqylasyna bólendi. Onda Raiymbek pen Kegen aýdandarynyń sáigúlikteri synǵa túsip, bul báigeniń de jeńimpazdary avtokólik iesi atandy. Ózge qatysýshylar da syilyqtan qur qalǵan joq.
Dodaǵa qatysqan shabandozdyń biri – Islamáli Ertós.
«Bul báigege Uzynaǵash aýylynan arnaiy keldim. Shalkóde jailaýyn ekinshi márte kórip turmyn. 4 jyl buryn dál osy jailaýda ótken «Jolan júirigine» qatysqan bolatynmyn. Báigede básekege túsip júrgenime bes jyldai ýaqyt boldy. Talai márte jeńimpaz da atandyq. Degenmen búgingi jeńistiń orny tym bólek. Osyndai dúbirli toida júldeli bolǵanyma qýanyshtymyn», – dedi ol.
Mereitoi aiasynda uiymdastyrylǵan is-sharalardyń joǵary deńgeide ótýine zamanaýi tsifrlyq tehnologiialar da sep boldy. Almaty oblysynyń Tsifrlyq tehnologiialar basqarmasy «Freedom Satellite» JShS-men birlesip, Shalkóde jailaýynda «Starlink spýtnik internet júiesin» iske qosty. Sonyń nátijesinde festival qonaqtary men qatysýshylary taýly aimaqta joǵary jyldamdyqty internetti erkin paidalandy.
Is-shara aiasynda sondai-aq «Taza Qazaqstan» aktsiiasy aýqymdy túrde uiymdastyryldy. Sanitarlyq tazalyqty qamtamasyz etý maqsatynda is-shara ótetin aýmaqta barlyǵy 105 biodárethana jáne 75 qoqys konteineri ornalastyryldy. Tazalyq jumystaryn júrgizýge 3 birlik arnaiy qoqys tasymaldaýshy tehnika jumyldyryldy. «Taza Qazaqstan» aktsiiasyna 1000 qap, 1000 qolǵap daiyndalyp, 110 volonter tartyldy, sondai-aq aýyl turǵyndary, jastar, belsendi azamattar qatysyp, is-shara ótken aýmaqtyń sanitarlyq tazalyǵyn qamtamasyz etti. Nátijesinde 7 tonnaǵa jýyq qatty turmystyq qaldyqtar shyǵaryldy. Is-shara ótken 116 480 m² aýmaqta «Taza Qazaqstan» ekologiialyq aktsiiasyn nasihattaý maqsatynda 20 banner ornalastyryldy. Tuzkól aýylynan is-shara ótetin orynǵa deiingi 28 shaqyrym jol boiyna ár 5 shaqyrym saiyn 8 qoqys konteineri qoiyldy. Is-shara aiaqtalǵannan keiin barlyq konteinerler men qaldyqtardy ýaqytsha jinaý oryndarynan barlyq qoqys jinaldy. Jinalǵan qatty turmystyq qaldyqtar arnaiy qoqys tasymaldaýshy tehnikalarǵa tielip, belgilengen qoqys poligonyna shyǵaryldy.
