Otan qorǵaýshylar kúni - erlik pen eldiktiń merekesi. Osy oraida Almaty oblysynda 7 mamyr – Otan qorǵaýshylar kúni el tynyshtyǵy kúzetinde júrgen azamattarǵa airyqsha qurmet kórsetilip, mańyzy zor rýhani-patriottyq sharalar uiymdastyryldy, dep habarlaidy dalanews.kz.
Almaty oblysynyń ákimi Marat Sultanǵaziev 7 mamyr - Otan qorǵaýshylar kúni qarsańynda «Arystan» mamandandyrylǵan litseiine arnaiy baryp, oqý ornynyń tynys-tirshiligimen tanysty.
Respýblikadaǵy biregei oqý ordasy sanalatyn bul litseidiń 15 jyldyq tarihy bar. Osy ýaqyt ishinde 1 myńnan astam túlek daiarlap, el qorǵany bolar jas sarbazdardy tárbieleýde airyqsha ról atqaryp keledi.
Sapar barysynda ákim litsei tárbielenýshilerimen kezdesip, olardyń oqý úderisi, áskeri daiarlyǵy jáne turmys jaǵdaiymen tanysty. Sonymen qatar, jastarǵa patriottyq tárbie berýdiń mańyzdylyǵyn atap ótip, bolashaq el qorǵaýshylaryna sáttilik tiledi.
Merekege orai oblystyń barlyq aýdan-qalalarynda mádeni, sporttyq is-sharalar ótti. Atap aitqanda, Alataý qalalyq Mádeniet úiinde «Beibit ómirdiń berik qalqany» atty merekelik kesh uiymdastyryldy.
Eńbekshiqazaq aýdanyndaǵy T.Moldaǵulov atyndaǵy Mádeniet úii men Shelek aýylynyń ortalyq alańynda «PATRIOT FEST» jastar arbat keshi ótti. Shara aiasynda asyq atý jáne bes asyqtan chempionat uiymdastyrylyp, Aimen aýylynda kókpar tartyldy.
Jambyl aýdanyndaǵy B.Momyshuly atyndaǵy №28237 áskeri bóliminde «Erlik» jobasy aiasynda ashyq esik kúni ótse, Raiymbek aýdanynyń Narynqol aýyldyq Mádeniet úiinde «Er – eliniń qorǵany» atty merekelik baǵdarlama uiymdastyryldy.
Kegen aýdanyndaǵy J.Ermegiiaev atyndaǵy orta mektepte er muǵalimder arasynda mini-fýtboldan oblystyq týrnir ótkizildi. Qarasai aýdanynyń Qaskeleń qalasynda «Ustaz barysy» qazaq kúresinen jarys uiymdastyrylsa, Talǵar aýdanynda velosporttan respýblikalyq jarys pen boksshy Eset Malǵajdarulyn eske alýǵa arnalǵan respýblikalyq ashyq týrnir bastaldy. Al Uiǵyr aýdanynyń Shonjy aýylynda patriottyq kezdesý keshi ótti.
Aitýly mereke aiasynda Qonaev qalasyndaǵy №58012 áskeri bólim bazasynda arnaiy kórme uiymdastyrylyp, qaladaǵy Mádeniet úiinde saltanatty jiyn ótti.
Saltanatty kesh Súiinbai atyndaǵy Almaty oblystyq filarmoniiasy ónerpazdarynyń merekelik kontsertine ulasty.
Osylaisha Almaty oblysynda Otan qorǵaýshylar merekesi keń kólemde atap ótilip, eldiń rýhyn kóteretin, patriottyq sezimin asqaqtatatyn mazmundy, taǵylymdy sharalarǵa toly boldy.
