Almaty oblysynda 14 jastan asqan oqýshylar men stýdentter jazǵy úsh ailyq kanikýl kezinde ýaqytsha jumysqa ornalasyp, 350 myń teńgege deiin tabys taba alady. Iaǵni jazǵy demalysty tiimdi paidalanyp, ai saiyn shamamen 118 myń teńgege deiin jalaqy alý múmkindigi bar, dep habarlaidy dalanews.kz.
Ol úshin Enbek.kz elektrondyq eńbek birjasyna kirip, «Meniń jazǵy kanikýlym» bólimine tirkelip, túiindeme júkteý qajet. Keiin jastar ózine yńǵaily bos jumys oryndaryn tańdap, ótinim bere alady. Al 14–15 jastaǵy oqýshylar úshin platformadaǵy jeke kabinetke ata-anasy nemese zańdy ókili tirkeledi.
Baǵdarlama Eńbek mobildigi ortalyǵy arqyly, «Qoǵamdyq jumystar» baǵdarlamasy aiasynda júzege asyrylady. Jasóspirimderdi ýaqytsha jumyspen qamtý baǵdarlamasy maýsym aiynda bastalady. Joba aiasynda biyl 800-ge jýyq oqýshy men stýdent jumysqa qabyldanady.
Jastar dúken kómekshisi, kýrer, animator, promoýter, kitaphana nemese lager jetekshisiniń kómekshisi, SMM mamany sekildi jeńil ári qaýipsiz jumystardy atqarady. Olar kúnine shamamen 7 saǵatqa deiin jumys istei alady.
QR Eńbek kodeksine sáikes, 14–16 jas aralyǵyndaǵy jasóspirimderdiń jumys ýaqyty aptasyna 24 saǵattan, al 16–18 jas aralyǵyndaǵy jastar úshin 36 saǵattan aspaýy tiis.
«Bizdiń basty maqsatymyz – jastarǵa qaýipsiz eńbek jaǵdaiynda alǵashqy jumys tájiribesin alýǵa múmkindik berý. Baǵdarlama eńbek mádenietin qalyptastyryp, bolashaq mamandyqty tańdaýǵa da yqpal etedi. Jumysqa ornalastyrý tolyqtai Eńbek kodeksi aiasynda júrgiziledi. Jobaǵa 14 jastan bastap qatysýǵa bolady. Alaida 14–15 jastaǵy jasóspirimder jumysqa ata-anasynyń nemese zańdy ókiliniń notarialdy kýálandyrylǵan kelisimimen ǵana qabyldanady. Al 16–18 jas aralyǵyndaǵy jastar platformaǵa óz betinshe tirkelip, bos jumys oryndaryna ótinim bere alady. Jumysqa qabyldanǵannan keiin eńbek sharty men jumysqa ornalasqany týraly habarlama ata-analardyń telefonyna avtomatty túrde jiberiledi. Jalaqy Almaty oblysynyń eńbek mobildiligi ortalyǵy arqyly tólenip, qarajat tikelei jetkinshektiń bank kartasyna aýdarylady», – dedi Almaty oblysy Jumyspen qamtýdy úilestirý jáne áleýmettik baǵdarlamalar basqarmasynyń basshysy Asyl Vaisov.
Qoldanystaǵy Eńbek kodeksine sáikes, kámeletke tolmaǵandarǵa aýyr jáne qaýipti jumystarda, túngi aýysymda, sondai-aq alkogol men temeki ónimderi satylatyn oryndarda eńbek etýge tyiym salynady. Sondyqtan júie zań talaptaryna sáikes kelmeitin vakansiialardy avtomatty túrde buǵattaidy.
Mansap ortalyǵy jumys berýshilerdiń qyzmetine kún saiyn monitoring júrgizedi. Jumys berýshiler eńbek portalynda jumys ýaqyty týraly málimetterdi ár aidyń 25-ine deiin tapsyryp otyrýy tiis.
Aita keteiik, 2025 jylǵy jazǵy demalys kezeńinde óńirdegi 500-ge jýyq oqýshy men stýdent ýaqytsha jumyspen qamtylǵan bolatyn. Onyń ishinde ataýly áleýmettik kómek alatyn jáne áleýmettik osal sanattaǵy otbasylardan shyqqan jastarǵa basymdyq berildi.
Baǵdarlama jastardyń bos ýaqytyn tiimdi ótkizýine, eńbek tájiribesin jinaqtaýyna jáne áleýmettik qoldaý kórsetýge baǵyttalǵan.
