Almaty oblysynda eks-depýtat 2,6 mlrd teńge sýbsidiiany zańsyz alǵan degen kúdikke ilindi, dep habarlaidy dalanews.kz.
Qarjylyq monitoring agenttiginiń Almaty oblysy boiynsha departamenti agroónerkásip keshenin qoldaýǵa bólingen biýdjet qarajatyn asa iri kólemde jymqyrý deregi boiynsha tergeýdi aiaqtap, qylmystyq isti sotqa joldady.
Tergeý málimetinshe, qylmystyq shemany Almaty oblysy Qarasai aýdandyq máslihatynyń burynǵy depýtaty uiymdastyrǵan. Ol aýyl sharýashylyǵyn sýbsidiialaý tetikterin paidalanyp, biýdjet qarjysyn zańsyz alý úshin ózine qarasty kásiporyndar men Almaty, Jambyl, Túrkistan oblystarynda tirkelgen 29 sharýa qojalyǵyn paidalanǵan.
Kúdiktiler ónerkásiptik tańqýrai ósirýge arnalǵan elitalyq kóshetter satyp alynǵany týraly jalǵan qujattardy ýákiletti organdarǵa tapsyrǵan. Ol úshin jalǵan satyp alý-satý sharttary, qabyldaý aktileri, elektron shot-faktýralar jáne ózge de qujattar rásimdelgen.
Alaida tergeý barysynda qujatta kórsetilgen kólemdegi kóshetter jetkizilmegeni anyqtalǵan. Sonymen qatar, keibir sharýashylyqtardyń ónerkásiptik kólemde tańqýrai ósirýge múmkindigi bolmaǵan.
Osynyń saldarynan memleketten 2,6 milliard teńgeden asa sýbsidiia zańsyz alynǵan. Tergeý deregine sáikes zańsyz alynǵan qarajattyń 491 million teńgesi qor naryǵynda investitsiialanǵan. Ol úshin kúdiktiniń jubaiynyń atyna brokerlik shot ashylyp, qazaqstandyq jáne sheteldik kompaniialardyń baǵaly qaǵazdary satyp alynǵan.
Taǵy 400 million teńge iSolutions Capital mikroqarjy uiymyna ýaqytsha qarjylai kómek retinde aýdarylyp, keiin qolma-qol aqshaǵa ainaldyrylǵan.
Sondai-aq, kúdikti urlanǵan qarajattyń 170 million teńgesin Qonaev qalasyndaǵy kazinoda jumsaǵan.
Sot sanktsiiasymen kúdiktilerdiń tórt páterine, úsh kóligine, jeke turǵyn úiine jáne baǵaly qaǵazdaryna tyiym salyndy. Úsh kúdikti qamaýǵa alyndy. Qylmystyq is sotqa joldandy.
