Almatyda 2025–2026 oqý jyly resmi túrde qorytyndylandy. Qaladaǵy 360 mektepte bilim alǵan 357 222 oqýshy úshin jazǵy demalys bastaldy. Bul týraly Almaty qalasy Bilim basqarmasynyń ókilderi málimdedi, dep habarlaidy dalanews.kz.
Oqý jyly «Adal azamat» baǵdarlamasy aiasynda ótken «Bilimim – Otanyma» atty biryńǵai synyp saǵatymen túiindeldi. Al mektep túlekteri úshin «Mektebim, saǵan myń alǵys!» atty saltanatty jiyn uiymdastyryldy.
Biyl qala mektepterin 51 391 oqýshy támamdady. Onyń ishinde 30 411 oqýshy 9-synypty bitirse, olardyń shamamen 11 myńy kolledjderde bilimin jalǵastyrýdy josparlap otyr.
11-synypty aiaqtaǵan 20 980 túlekke jalpy orta bilim týraly attestat tabystalady. Onyń 17 493-i memlekettik mektepterdiń, al 3 487-si jekemenshik bilim berý uiymdarynyń oqýshylary. Sonymen qatar, 799 túlek «Altyn belgige» úmitker atanyp otyr.
Qorytyndy attestattaý emtihandary 29 mamyr men 15 maýsym aralyǵynda ótedi. Attestattardy saltanatty tabystaý rásimi 18 maýsymǵa josparlanǵan.
Almaty qalasy Bilim basqarmasynyń basshysy Sáken Aralbaev mektep bitirý is-sharalarynda qaýipsizdik talaptary basty nazarda bolatynyn aitty.
«Biz túlekter bul kúndi tek jaǵymdy esteliktermen este saqtaýy úshin barlyq jaǵdai jasaimyz. Sondyqtan zańsyz aqsha jinaýǵa jol berilmeidi. Animatorlar, avtokortejder men artyq saltanatty sharalar uiymdastyrylmaidy. Mektep eń aldymen balalar úshin jumys isteýi kerek. Barlyq is-shara mektep aýmaǵynda, kúsheitilgen baqylaýmen jáne qaýipsizdik talaptaryn saqtai otyryp ótkiziledi», – dedi Sáken Aralbaev.
Basqarma ókilderiniń málimetinshe, biylǵy oqý jyly almatylyq oqýshylar úshin jetistikterge toly boldy. 160 myńnan astam oqýshy ǵylymi jáne shyǵarmashylyq baiqaýlarǵa qatysyp, 2,7 myńnan asa júldege ie bolǵan.
Sonymen qatar Almaty quramasy 24 jyl qatarynan jaratylystaný-matematikalyq baǵyttaǵy respýblikanyń úzdik olimpiadalyq komandasy atandy.
Halyqaralyq deńgeidegi bilim dodalarynda da almatylyq oqýshylar joǵary nátije kórsetti. Olar Litvada ótken European Mathematical Olympiad, Týnistegi I-FEST² jáne AQSh-taǵy FIRST Championship sekildi bedeldi jarystarda jalpy sany 99 medal jeńip aldy.
Qalada bilim berý infraqurylymyn damytý jumystary da jalǵasýda. 2025–2026 oqý jylynda 37 bilim berý nysany paidalanýǵa berilip, nátijesinde 40 myńǵa jýyq jańa oryn ashyldy.
«Keleshek mektebi» ulttyq jobasy aiasynda jalpy syiymdylyǵy 34 200 oryndyq 20 jańa mektep iske qosyldy. Budan bólek, qosymsha oqý korpýstary men memlekettik balabaqshalar salyndy.
«Bizdiń maqsat — tek ekinshi aýysymdy qysqartý emes, bilim berý sapasyn jańa deńgeige kóterý. STEM-zerthanalary, robototehnika jáne jasandy intellekt kabinetterimen jabdyqtalǵan zamanaýi mektepter, jańartylǵan telekommýnikatsiia kolledji, “Samǵaý” men “Shabyt” shyǵarmashylyq ortalyqtary — qazirgi qoǵam suranysyna berilgen naqty jaýap. Sonymen qatar jetim balalarǵa arnalǵan “Januia” kesheni tolyqtai jańǵyrtyldy», – dedi Sáken Aralbaev.
Sondai-aq, basqarma ókilderi jazǵy demalys kezinde oqýshylarǵa arnalǵan «Balalar kitaphanasy» jobasy aiasynda kitap oqý men film kórýge qatysty usynymdar ázirlengenin habarlady. Budan bólek, ata-analarmen balalardyń qaýipsizdigine qatysty qosymsha túsindirý kezdesýleri uiymdastyrylady.
