Almaty qalasy Qalalyq josparlaý jáne ýrbanistika basqarmasynyń eks basshysy Almashan Ahmedjanovqa qatysty tergeý aiaqtaldy, - dep habarlaidy Dalanews.kz.
Bul týraly Antikordyń Tengrinews.kz redaktsiiasyna bergen resmi jaýabynda belgili boldy.
"Almaty qalasy Qalalyq josparlaý jáne ýrbanistika basqarmasynyń burynǵy basshysyna jáne basqa da tulǵalarǵa qatysty tergeý aiaqtaldy. Qazirgi ýaqytta qylmystyq protseske qatysýshylar Qazaqstan Respýblikasy Qylmystyq-protsestik kodeksiniń 295, 296-baptaryna sáikes is materialdarymen tanysyp jatyr", - delingen resmi jaýapta.
Eske salaiyq, byltyr shilde aiynda Almaty qalasy Qalalyq josparlaý jáne ýrbanistika basqarmasynyń burynǵy basshysy Almashan Ahmedjanov eki aiǵa qamaýǵa alynǵan bolatyn. Laýazymdy tulǵa jer telimderin berý jáne nysandar qurylysyna ruqsat berý kezinde laýazymdyq ókilettikterin asyra paidalandy degen kúdikke ilindi.
