Almaty qalasynyń Áýezov aýdanynda jańa oqý oryndary men qoldanystaǵy mektepterge qosymsha ǵimarattar, balabaqshalar salý boiynsha josparly jumys júrgizilýde. Bul týraly Almaty qalasynyń ákimi Erbolat Dosaev aýdan turǵyndarymen kezdesý barysynda málimdedi, dep habarlaidy Dalanews.kz
«Áýezov aýdanynyń turǵyndary úshin sapaly áleýmettik infraqurylymmen qamtamasyz etý meniń erekshe baqylaýymda. Halyqtyń ósýin eskere otyryp, oqýshy oryndarynyń tapshylyǵyn odan ári tómendetý úshin jańa mektepter men qosymsha ǵimarattar salý boiynsha júieli jumys iske asyrylýda», - dedi Erbolat Dosaev.
Búgingi tańda aýdanda oqýshy oryndarynyń tapshylyǵy 5 myńnan asady. Bul máseleni sheshý úshin ótken jyldyń qyrkúieginde №1 shaǵyn aýdanda №97 mekteptiń apatty ǵimaratynyń ornyna salynǵan 600 oryndyq alǵashqy jaily mektep salyndy. 2024 jyldyń qarasha aiynda 1200 orynǵa eseptelgen seismikalyq kúsheitilgen №9 mektepti kúrdeli jóndeý aiaqtaldy.
Sondai-aq, 1976 jyly salynǵan jáne 20 jyldan astam kúrdeli jóndeýden ótpegen №13 mekteptiń jáne eski ǵimarattardy buza otyryp, №158 mekteptiń (1978 jyly salynǵan) jańa ǵimarattaryn salý úshin jobalaý-smetalyq qujattama ázirlenýde.
Qurylys basqarmasy Aqsai-2 sh/a 33 úi mekenjaiy boiynsha 300 oryndyq №42 mektepke qosalqy nysan salýǵa JSQ ázirleýde. Memlekettik saraptamadan shyǵý merzimi-2025 jyldyń úshinshi toqsany.
Bul jobalardy iske asyrý osy jyldyń qyrkúiek aiynda memlekettik saraptamanyń qorytyndylaryn alǵannan keiin bastalady, al olardy ashý kelesi oqý jyly bastalǵanǵa deiin josparlanǵan.
Aita keteiik, «Jaily mektep» ulttyq jobasyn júzege asyrý aiasynda Almaty qalasy boiynsha 35,6 myń oqýshyǵa arnalǵan 21 mekteptiń qurylysy josparlanǵan. Sondai-aq 1305 oryndyq mektepterge 6 qosymsha qurylys salynady.
Almaty ákimi mektepke deiingi bilim berý mekemelerindegi oryn tapshylyǵyn azaitýǵa erekshe nazar aýdarady, ol 6 122 oryndy quraidy. Aǵymdaǵy jyldyń tamyz aiynda Áýezov aýdanynda eki balabaqshanyń qurylysy aiaqtalady: №10 shaǵyn aýdanynda 160 oryndyq jáne «Altyn besik» shaǵyn aýdanynda 120 oryndyq.
2025 jyldyń maýsym aiynda Taýgúl shaǵynaýdanyndaǵy apatty ǵimaratty almastyratyn 120 oryndyq balabaqsha qurylysyna memlekettik saraptama qorytyndysyn alý kútilýde. Qurylys jumystary 2025 jyldyń qyrkúieginde bastalyp, 2026 jyldyń qarashasynda aiaqtalady dep josparlanýda.
