Almatynyń Almaly aýdanynda ákim Erbolat Dosaevtyń tapsyrmasymen «Halyq qatysatyn biýdjet» baǵdarlamasy aiasynda biyl 56 aýla kóriktendirildi, dep habarlaidy Dalanews.kz
Qazirgi tańda Panfilov kóshesi, 30; Shagabýtdinov kóshesi, 30; Tóle bi kóshesi, 160; Qabanbai batyr kóshesi, 91 jáne Sháripov kóshesi, 68 mekenjailaryndaǵy bes aýlanyń jumysy aiaqtaldy. Munda oiyn jáne sport alańdary jańartylyp, rezeńke jabyn tóseldi, oryndyqtar men qoqys jáshikteri ornatyldy. Sháripov kóshesi, 68 mekenjaiynda turǵyndardyń ótinishi boiynsha sport alańyna úlken qalqa ornatyldy.
«Sport alańynyń kórkeitilgenine qýanyshtymyn, úlken qalqa ornatyldy, bul ashyq aýada sportpen ainalysatyndarǵa yńǵaily. Kún sáýlesi men jańbyrdan jaqsy qorǵanys. Men ústel tennisin jii oinaimyn nemese kóshedegi jattyǵý qurylǵylarynda jattyǵamyn. Endi bári jaqyn, jattyǵý jasaǵanda yńǵaily, jaqsy boldy. Bizdiń aýlalar belsendi demalys pen aralasýǵa arnalǵan orynǵa ainalyp jatqanyna qýanyshtymyz», – dedi aýdan turǵyny Medet Ahmetov.
2025 jyly «HQB» baǵdarlamasy aiasynda aýdan boiynsha barlyǵy 45 joba júzege asyrylady. Kórkeitý jumystary biyl sáýir men qazan ailary aralyǵynda júrgiziledi.
Qaýipsiz ári tiimdi turǵyn úi-kommýnaldyq infraqurylymdy qalyptastyrý maqsatynda 7 kópqabatty turǵyn úige jóndeý júrgizý josparlanǵan. Bul úilerdiń shatyry, qasbeti jáne injenerlik jelileri jańartylady. Sonymen qatar, 5 kópqabatty úide jedelsaty jabdyqtary aýystyrylady.
Esterińizge sala keteiik, 2024 jyly 11 kópqabatty turǵyn úide 18 jedelsaty jabdyǵy jańartylyp, 7 turǵyn úige jóndeý jumystary júrgizilgen bolatyn. Sondai-aq, 2024 jyly aýdan boiynsha «HQB» aiasynda 52 joba iske asyrylyp, qosymsha 23 aýla aýmaǵynda aǵymdaǵy jóndeý jumystary atqaryldy.
Jalpy, sońǵy úsh jylda Almatyda 938 joba júzege asyrylǵan.
