Almatyda qyrkúıektiń úshinshi jeksenbisinde dástúrli Qala kúni merekesi bastaldy. Megapolıs aýmaǵynda konsertter, kórmeler, fleshmobtar, festıválder men túrli mádenı is-sharalar uıymdastyrylyp jatyr.
Qala ákiminiń quttyqtaýy
Merekelik baǵdarlamalar Astana alańynda ótken konsertten bastaý aldy. Onda qala ákimi Darhan Satybaldy almatylyqtardy jáne qala qonaqtaryn Qala kúnimen quttyqtady.
"Barshańyzdy shyn júrekten Qala kúni merekesimen quttyqtaımyn! Almaty – Táýelsizdiktiń altyn besigi, elimizdiń jańa dáýiri bastalǵan shahar. Almatynyń eń úlken baılyǵy – onyń turǵyndary. Sizderdiń eńbekterińiz ben belsendilikterińiz qalamyzdy zamanaýı ári serpindi megapolıske aınaldyryp otyr. Biz Almatyny jaıly da órkendegen qala etý úshin bar kúshimizdi salyp kelemiz. Memleket basshysy Qasym-Jomart Toqaev bizge ekologıa, qaýipsizdik jáne qalalyq ortanyń sapasyna erekshe mán berýdi tapsyrd", – dedi qala ákimi.
Damý baǵyttary
Ákimniń aıtýynsha, bul mindetterdi júzege asyrý úshin Almatyda bes negizgi damý baǵyty belgilengen. Olar – kólik júıesin jańǵyrtý, ekologıany jaqsartý, bıznesti qoldaý, áleýmettik ınfraqurylymdy damytý jáne turǵyndarmen ashyq dıalog ornatý.
"Osy basymdyqtardy júıeli oryndaý Almatyny shynymen jasyl, qaýipsiz ári qolaıly qalaǵa aınaldyrady", – dep atap ótti Satybaldy.
Alma Fest-2025
Resmı quttyqtaýdan keıin ákim Alma Fest-2025 festıvaline qatysty. Tuńǵysh Prezıdent saıabaǵynda ótken merekede fermerler shamamen 100 tonna alma ákeldi. Qonaqtar súıikti sorttarynyń dámin tatyp, túrli kórmeler men ulttyq dástúrlerge toly baǵdarlamany tamashalady.
Saıabaq aýmaǵy dástúrge saı egin men mádenıettiń úlken merekesine aınaldy. Munda alma jármeńkesi, etnoaımaq, qoldanbaly óner buıymdarynyń kórmesi, gastronomıalyq alańdar, balmuzdaq festıvali men ashyq aspan astyndaǵy kınoteatr uıymdastyryldy.
Qala boıynsha sharalar
Jalpy Qala kúni aıasynda Almatyda mazmundy baǵdarlama ázirlendi. Ár aýdanda ekologıalyq aksıalar, jármeńkeler, fleshmobtar, kitaphanalarda ádebı keshter, murajaılarda taqyryptyq kórmeler ótýde. Sonymen birge áleýmettik mańyzy bar nysandar ashylyp, sporttyq jarystar men mádenı-buqaralyq is-sharalar uıymdastyryldy.
