الماتىدا قىركۇيەكتىڭ ءۇشىنشى جەكسەنبىسىندە ءداستۇرلى قالا كۇنى مەرەكەسى باستالدى. مەگاپوليس اۋماعىندا كونسەرتتەر، كورمەلەر، فلەشموبتار، فەستيۆالدەر مەن ءتۇرلى مادەني ءىس-شارالار ۇيىمداستىرىلىپ جاتىر.
قالا اكىمىنىڭ قۇتتىقتاۋى
مەرەكەلىك باعدارلامالار استانا الاڭىندا وتكەن كونسەرتتەن باستاۋ الدى. وندا قالا اكىمى دارحان ساتىبالدى الماتىلىقتاردى جانە قالا قوناقتارىن قالا كۇنىمەن قۇتتىقتادى.
"بارشاڭىزدى شىن جۇرەكتەن قالا كۇنى مەرەكەسىمەن قۇتتىقتايمىن! الماتى – تاۋەلسىزدىكتىڭ التىن بەسىگى، ەلىمىزدىڭ جاڭا ءداۋىرى باستالعان شاھار. الماتىنىڭ ەڭ ۇلكەن بايلىعى – ونىڭ تۇرعىندارى. سىزدەردىڭ ەڭبەكتەرىڭىز بەن بەلسەندىلىكتەرىڭىز قالامىزدى زاماناۋي ءارى سەرپىندى مەگاپوليسكە اينالدىرىپ وتىر. ءبىز الماتىنى جايلى دا وركەندەگەن قالا ەتۋ ءۇشىن بار كۇشىمىزدى سالىپ كەلەمىز. مەملەكەت باسشىسى قاسىم-جومارت توقايەۆ بىزگە ەكولوگيا، قاۋىپسىزدىك جانە قالالىق ورتانىڭ ساپاسىنا ەرەكشە ءمان بەرۋدى تاپسىرد"، – دەدى قالا اكىمى.
دامۋ باعىتتارى
اكىمنىڭ ايتۋىنشا، بۇل مىندەتتەردى جۇزەگە اسىرۋ ءۇشىن الماتىدا بەس نەگىزگى دامۋ باعىتى بەلگىلەنگەن. ولار – كولىك جۇيەسىن جاڭعىرتۋ، ەكولوگيانى جاقسارتۋ، بيزنەستى قولداۋ، الەۋمەتتىك ينفراقۇرىلىمدى دامىتۋ جانە تۇرعىندارمەن اشىق ديالوگ ورناتۋ.
"وسى باسىمدىقتاردى جۇيەلى ورىنداۋ الماتىنى شىنىمەن جاسىل، ءقاۋىپسىز ءارى قولايلى قالاعا اينالدىرادى"، – دەپ اتاپ ءوتتى ساتىبالدى.
Alma Fest-2025
رەسمي قۇتتىقتاۋدان كەيىن اكىم Alma Fest-2025 فەستيۆالىنە قاتىستى. تۇڭعىش پرەزيدەنت ساياباعىندا وتكەن مەرەكەدە فەرمەرلەر شامامەن 100 توننا الما اكەلدى. قوناقتار سۇيىكتى سورتتارىنىڭ ءدامىن تاتىپ، ءتۇرلى كورمەلەر مەن ۇلتتىق داستۇرلەرگە تولى باعدارلامانى تاماشالادى.
ساياباق اۋماعى داستۇرگە ساي ەگىن مەن مادەنيەتتىڭ ۇلكەن مەرەكەسىنە اينالدى. مۇندا الما جارمەڭكەسى، ەتنوايماق، قولدانبالى ونەر بۇيىمدارىنىڭ كورمەسى، گاسترونوميالىق الاڭدار، بالمۇزداق فەستيۆالى مەن اشىق اسپان استىنداعى كينوتەاتر ۇيىمداستىرىلدى.
قالا بويىنشا شارالار
جالپى قالا كۇنى اياسىندا الماتىدا مازمۇندى باعدارلاما ازىرلەندى. ءار اۋداندا ەكولوگيالىق اكسيالار، جارمەڭكەلەر، فلەشموبتار، كىتاپحانالاردا ادەبي كەشتەر، مۇراجايلاردا تاقىرىپتىق كورمەلەر وتۋدە. سونىمەن بىرگە الەۋمەتتىك ماڭىزى بار نىساندار اشىلىپ، سپورتتىق جارىستار مەن مادەني-بۇقارالىق ءىس-شارالار ۇيىمداستىرىلدى.
