«Taza Qazaqstan» respýblikalyq baǵdarlamasy jáne «Almaty – bizdiń ortaq úiimiz» qalalyq naýqany aiasynda qalalyq ortany jaqsartýǵa jáne qaldyqtardy turaqty óńdeýge baǵyttalǵan kezekti joba iske qosyldy, dep habarlaidy Dalanews.kz
Toqyma qaldyqtaryn jinaý, suryptaý jáne qaita óńdeýge baǵyttalǵan FABRIKA jobasy bir aidyń ishinde alǵashqy nátije kórsetti. Búgingi tańda qalada 18 arnaýly konteiner ornatyldy, jaqynda taǵy 22 konteiner ornatý josparlanǵan. Bolashaqta jobanyń qamtý aýqymy Almatynyń basqa aýdandaryna da keńeitiledi.
Iske qosylǵan sátten bastap 20 000 kilogramnan astam toqyma jinaldy, ol suryptalyp, qala aýmaǵynda qaita óńdeledi. Bul materialdardan ónerkásipte qoldanylatyn qaita óńdelgen talshyq pen súrtý shúberekteri jasalady. Sonymen qatar, jinalǵan kiimniń shamamen 13%-y qaiyrymdylyq uiymdaryna beriledi, sebebi olar áli de paidalanýǵa jaramdy.
Ekologiialyq baǵalaýlar boiynsha qazirdiń ózinde jinalǵan kólemdi qaita óńdeý 74 000 kilogramnan astam CO₂ ekvivalentiniń aýaǵa taralýyn boldyrmaýǵa múmkindik beredi – bul mólsherdegi kómirqyshqyl gazyn bir jylda 3 730-dan astam aǵash sińire alar edi.
Qazaqstandaǵy osyndai aýqymdaǵy alǵashqy bastama FABRIQA jobasy Almaty qalasynyń Ekologiia jáne qorshaǵan orta basqarmasynyń qoldaýymen júzege asyrylǵan. Joba ekologiialyq turaqty sheshimderdiń tiimdi ári áleýmettik mańyzy bar ekenin kórsetip otyr. Maqsaty – ai saiyn 120 000 kilogramǵa deiin toqyma qaldyqtaryn jinap, olardyń poligonǵa tastalýyn azaitý jáne qala turǵyndaryn sanaly tutyný men qaita óńdeý mádenietine tartý.
