Bul týraly Óńirlik kommýnikatsiialar qyzmetiniń alańynda Qazaqstan Musylmandar dini basqarmasy basshysynyń orynbasary, naib múftii Kenjeǵali qajy Qońyratbaiuly men Almaty qalasynyń Ortalyq meshitiniń naib-imamy Rýslan Qaiyrgeldi aitty.
– Elimizdiń Bas múftii Naýryzbai qajy Taǵanuly hazret kásipker azamattardy, saýda ortalyqtarynyń basshylaryn qasietti aidyń qurmeti úshin halqymyzdyń turmys jaǵdaiyn eskerip, áleýmettik mańyzy bar taýarlar men azyq-túlik baǵasyn múmkindiginshe 10 paiyzǵa deiin tómendetip, jeńildik jasaýǵa shaqyrǵan úndeýine almatylyq kásipkerlerdi ún qosýǵa shaqyramyn, – dedi Kenjeǵali qajy Qońyratbaiuly.
Osy sátti paidalana otyryp, spikerler qasietti Ramazan aiynda araq-sharap ishilmese jáne dúkenderde satylmasa, múmkindiginshe qudaiy astar keshki aýyzashar ýaqytynda ótkizilse degen tilekterin jetkizdi.
Óz kezeginde Ortalyq meshittiń naib-imamy osy aida saýapty ister jasap, jekelei alǵanda, múmkindiginshe halyqqa jeńildikter jasaýǵa shaqyrdy.
Esterińizge sala keteiik, biyl qasietti Ramazan aiy Naýryz merekesimen tuspa-tus kelip otyr jáne ol naýryzdyń 23-de bastalady. Osyǵan bailanysty, qalanyń tórt meshitinde arnaiy merekelik, qaiyrymdylyq is-sharalar ótkiziledi.
