Almatylyq dáriger patsienttiń qos tizesine bir mezgilde ota jasady
Viktor Alekseevichtiń sol jaq tizesiniń aýyrǵanyna 25 jyldan asqan. Sońǵy jyldary oń aiaǵy da syrqyrap mazasyn ala bastaǵan. Emhanada jasaǵan konservativtik em-dom eshqandai nátije bermepti.
«Pyshaqqa túskim kelmei talai dári-dármek ishtim, jaqpamailardy jaqtym, ýkol da saldyrdym. Ókinishke qarai paidasy shamaly boldy. Sońǵy kezde aýrýym janyma qatty batqan soń dárigerler býyn almastyrýdy usyndy», - deidi Viktor Samýsenko.
Kóp jaǵdaida dárigerler eki tizeniń býynyn qatar almastyrmaidy. Óitkeni patsient úshin kúrdeli operatsiianyń saldary da ońaiǵa soqpaidy. Almaty qalasynda mundai biregei operatsiiany №4 qalalyq aýrýhana dárigeri Manarbek Áýbákirov qana jasaidy eken.
Dárigerdiń sózine súiensek, bul ota tehnikalyq jaǵynan kúrdeli bolǵanymen, onyń birqatar artyqshylyqtary da bar.
«Máselen, patsient qaita-qaita tekserýden ótpeidi, narkozdy da azyraq alady. Eń bastysy, operatsiiadan keiingi reabilitatsiia ýaqyty qysqarady. Bir jaǵynan, eki tizege birdei operatsiia jasalǵanda adam aǵzasyna aitarlyqtai kúsh túsedi. Sondyqtan mundai otany aýyr sozylmaly aýrýlarǵa shaldyqpaǵan, jastar men orta jastaǵy adamdarǵa ǵana jasaimyz. Sebebi aiaqty teńshep, qimyl-qozǵalys biomehanikasyn qalpyna keltirý ońai emes», - deidi Manarbek Áýbákirov.
Aitýynsha, eki tizege birdei ota jasaý týraly sheshimdi dáriger men patsient birge otyryp, ábden talqylap baryp qabyldaidy. Biraq Viktor Samýsenkonyń jasyna qaramastan ota sátti jasaldy, deidi maman.
Býyn almastyrý jalpy quny 1,5 mln teńgeden bastalatyn joǵary tehnologiialyq operatsiialar qataryna jatady. Endoprotezdeý sońǵy jyldary kóp jasalyp júrgen manipýliatsiialardyń biri. Sebebi ol býyny aýyratyn syrqattyń aýrýyn jeńildetip, emin-erkin júrip-turýyna múmkindik beredi.
