الماتىلىق دەرٸگەر پاتسيەنتتٸڭ قوس تٸزەسٸنە بٸر مەزگٸلدە وتا جاسادى
ۆيكتور الەكسەەۆيچتٸڭ سول جاق تٸزەسٸنٸڭ اۋىرعانىنا 25 جىلدان اسقان. سوڭعى جىلدارى وڭ اياعى دا سىرقىراپ مازاسىن الا باستاعان. ەمحانادا جاساعان كونسەرۆاتيۆتٸك ەم-دوم ەشقانداي نەتيجە بەرمەپتٸ.
«پىشاققا تٷسكٸم كەلمەي تالاي دەرٸ-دەرمەك ٸشتٸم, جاقپامايلاردى جاقتىم, ۋكول دا سالدىردىم. ٶكٸنٸشكە قاراي پايداسى شامالى بولدى. سوڭعى كەزدە اۋرۋىم جانىما قاتتى باتقان سوڭ دەرٸگەرلەر بۋىن الماستىرۋدى ۇسىندى», - دەيدٸ ۆيكتور سامۋسەنكو.
كٶپ جاعدايدا دەرٸگەرلەر ەكٸ تٸزەنٸڭ بۋىنىن قاتار الماستىرمايدى. ٶيتكەنٸ پاتسيەنت ٷشٸن كٷردەلٸ وپەراتسييانىڭ سالدارى دا وڭايعا سوقپايدى. الماتى قالاسىندا مۇنداي بٸرەگەي وپەراتسييانى №4 قالالىق اۋرۋحانا دەرٸگەرٸ ماناربەك ەۋبەكٸروۆ قانا جاسايدى ەكەن.
دەرٸگەردٸڭ سٶزٸنە سٷيەنسەك, بۇل وتا تەحنيكالىق جاعىنان كٷردەلٸ بولعانىمەن, ونىڭ بٸرقاتار ارتىقشىلىقتارى دا بار.
«مەسەلەن, پاتسيەنت قايتا-قايتا تەكسەرۋدەن ٶتپەيدٸ, ناركوزدى دا ازىراق الادى. ەڭ باستىسى, وپەراتسييادان كەيٸنگٸ رەابيليتاتسييا ۋاقىتى قىسقارادى. بٸر جاعىنان, ەكٸ تٸزەگە بٸردەي وپەراتسييا جاسالعاندا ادام اعزاسىنا ايتارلىقتاي كٷش تٷسەدٸ. سوندىقتان مۇنداي وتانى اۋىر سوزىلمالى اۋرۋلارعا شالدىقپاعان, جاستار مەن ورتا جاستاعى ادامدارعا عانا جاسايمىز. سەبەبٸ اياقتى تەڭشەپ, قيمىل-قوزعالىس بيومەحانيكاسىن قالپىنا كەلتٸرۋ وڭاي ەمەس», - دەيدٸ ماناربەك ەۋبەكٸروۆ.
ايتۋىنشا, ەكٸ تٸزەگە بٸردەي وتا جاساۋ تۋرالى شەشٸمدٸ دەرٸگەر مەن پاتسيەنت بٸرگە وتىرىپ, ەبدەن تالقىلاپ بارىپ قابىلدايدى. بٸراق ۆيكتور سامۋسەنكونىڭ جاسىنا قاراماستان وتا سەتتٸ جاسالدى, دەيدٸ مامان.
بۋىن الماستىرۋ جالپى قۇنى 1,5 ملن تەڭگەدەن باستالاتىن جوعارى تەحنولوگييالىق وپەراتسييالار قاتارىنا جاتادى. ەندوپروتەزدەۋ سوڭعى جىلدارى كٶپ جاسالىپ جٷرگەن مانيپۋلياتسييالاردىڭ بٸرٸ. سەبەبٸ ول بۋىنى اۋىراتىن سىرقاتتىڭ اۋرۋىن جەڭٸلدەتٸپ, ەمٸن-ەركٸن جٷرٸپ-تۇرۋىنا مٷمكٸندٸك بەرەدٸ.
