Qurmetti jerlester! Almatylyq jastar! Biz, Almaty qalasynyń aqsaqaldar qaýymy qazir qoǵamda bop jatqan keibir jaǵdailarǵa qatysty asa alańdaýlymyz. Rasyn aitý kerek, kútpegen jerden bastalǵan «Qaiǵyly qańtar» oqiǵasy barshamyzdy eseńgiretip ketti.
«Egemendik alyp, eńse tikteý áste-áste, eldikten aiyrylyp qalý bir sátte» ekendigin kórdik. Syrttan synalap kirip, qoǵamdy ishten iritkisi kelgen qaskúnemder men qylmyskerler táýelsizdigimizdiń tuǵyryn shaiqap, tóńkerip tastai jazdady.
Prezidentimizdiń der kezinde qabyldaǵan shuǵyl sheshimderi arqasynda, batyl táýekelge baryp, shiraq qimyldaǵanynyń nátijesinde ǵana kieli azattyǵymyzdy saqtap qala aldyq.
Qoǵam ishinde júrip, qarapaiym turǵyndarmen kúndelikti kezdesip júrmiz. Sol azamattar qazir kóshede toptasqan adamdar toby kórinse, úreilenip, shoshityndaryn aitady. Beibit halyq qatty qorqyp qalǵan.
Ásirese, Almaty qalasy sodyrlardyń soiqanynan kóp zardap shekti. Qanshama ǵimarat órtke oranyp, saýda oryndary tonalyp, adam shyǵyny oryn aldy.
Búgingi tańda qala ákimdigi sol oqiǵalardyń saldaryn joiýǵa baryn salyp jatyr. Qiraǵan, órtengen ǵimarattar men saýda oryndaryn qalpyna keltirip, shyǵynǵa batqan kásipkerlerdi qoldap, jastarǵa jańa jumys oryndaryn ashýǵa árekettenýde.
Bizge qazir osy ótken oqiǵalardy durystap saralap, salqyn aqylmen, saliqaly sabyrmen ketken qateliktermen jumys jasaý qajet. Ol úshin qoǵamnyń tynyshtyǵy men turaqtylyǵy asa mańyzdy.
Ókinishke qarai, keiingi kezde, Almatymyzda sherýletken mitingiler men aiqaiǵa attan qosqan jiyndar qaitadan kóbeiip ketti. Onyń ózi baiyrqaly jiyn, basalqy keńes qurý bolsa quba-qup. Qalyń toptyń ortasyna kirip alyp, keibir teris piǵyldy, aram oily arandatýshylar el arasyna iritki salatyn urandar kóterip, qoǵam shańyraǵyn shaiqap, birligimizdi iritýdi kózdegendei.
Sóz joq, qazaq halqynyń tarihynda «Kúltóbeniń basynda kúnde jiyn jasaityn» zaman boldy. El aǵalary bas qosyp, alqa quryp aqyl-keńesterimen bólisti. Biraq, onyń basty ereksheligi – jón sózge toqtaityn halyq boldy.
Ataly sózge qulaq asyp, paryqty pikirge bas ietin minez bar edi. Búgingi bas qosýlar kerisinshe dańǵaza dabyr men beipil sózderge ulasyp, qisyq-qyńyr, qysyr qiqýlarǵa tolyp ketti. Oiǵa alýdyń ózi uiat sanalatyn anaiy sózderdi qaǵazǵa jazyp, uran qylyp uialmai kókke kóterýdi sán kóretin siyqsyz salt paida boldy.
Búgingi ýaqyt aýmaly-tókpeli zaman bolyp tur. Ainalymyzdaǵy memleketterdiń tynyshtyǵy bir sátte buzylyp, beibit turǵyndary shubyryp, memleketi soǵys otyna oranyp jatqanyn kórip jatyrmyz.
Bizge qazir ishki tynyshtyq pen myzǵymas turaqtylyq aýadai qajet. Jastardy, jalpy qoǵamdy sabyrǵa shaqyramyz! Etek-jeńimizdi jiyp, qazirgi ótpeli kezeńde judyryqtai jumylyp, uiymshyldyq tanytaiyq. Ainalamyzda, el ishinde oryn alyp jatqan keibir qiynshylyqtardyń barlyǵy ýaqytsha.
El Táýelsizdiginiń kepili – tatýlyq pen birlikte. Elimizdiń tynyshtyǵy buzylmasyn deimiz. Bizdiń atalyq tilegimiz, aqsaqaldyq nietimiz osy. El ishine kirip, ylań salýy kózdeitin arandatýshylardan saq bolaiyq. Qoǵam bolyp jumylyp, birtutas halyq bolyp birigip, Prezidentimizdiń ainalasyna toptasa alsaq ýaqytsha synaqtardyń barlyǵyn erkin eńseremiz. Elimiz aman, jurtymyz tynysh, zamanymyz beibit bolsyn!
Qol qoiǵandar
- Asanáli Áshimov
- Murat Áýezov
- Dýlat Isabekov
- Kádirbek Segizbaev
- Smaǵul Elýbaev
- Beksultan Nurjekeev
- Sáýle Dosjan
- Sát Toqpaqbaev
- Júrsin Erman
- Temirhan Medetbek
- Zeinep Ahmetova
- Marfýǵa Aithojina
- Aiagúl Mirazova
- Aqan Bijanov
- Naǵashybek Qapalbekuly
Kelisip, qoldaǵandar
- Tóregeldi Sharmanov
- Mekemtas Myrzahmetov
- Sábit Orazbaev
- Altynbek Qorazbaev
- Bibigúl Tólegenova
- Seiit Qasqabasov
