Kelesi aptada Almatyda 20 jyl boıy kútken oqıǵa oryn almaq. «Medeý» muz aıdynynyń tarıhı arenasynda aty ańyzǵa aınalǵan «Azıa daýysy» festıvaliniń fanfary qaıta shyrqalyp, úsh kúndik mereke ótedi.
Bul festıvál burynǵydan ózgeshe. Dástúrli halyqaralyq oryndaýshylar baıqaýy bolmaıdy. Bul - jańǵyrý konserti. Baıqaýdyń úsh kúni taqyryptyq maǵynasyna qaraı bólinip tastalyndy.
Festıváldiń ashylýy men birinshi kúnine Forbes Kazakhstan nusqasy boıynsha 30 jasqa deıingi talanttar reıtıńiniń qatysýshysy Azat Ábiken basqaratyn Green Case Event kompanıasy jaýapty bolady. Qazaq óneriniń ańyzy Bıbigúl Tólegenova birinshi bolyp sahnaǵa kóteriledi. Odan keıin halyq aldynda zamanaýı qazaq estradasynyń beldi ártisteri - Moldanazar, RaiM, Erke Esmahan, V$XV PRINCE, Mıras Júginisov, Marhaba Sábı, ORYNKHAN, Irına Kaıratovna, ZAQ syndy ónerpazdar shyqpaq.
Birinshi kún asa aıryqsha bolmaq. Sebebi, biz qyzyl kilemi tóselgen ashylý saltanatyn, aty ańyzǵa aınalǵan A-Studio tobynyń múzıkliniń túsirilimin kóremiz. Birinshi kúngi konsert tańǵalarlyq dron shoýymen aıaqtalady.
Festıváldiń ekinshi kúni – sahnada BLACK EYED PEAS! Will.I.Am, Taboo jáne apl.de.ap kórermender aldyna álemdi tań qaldyratyn hıtterimen shyǵady. Olardyń energıasy Medeýdi jaratyny sózsiz.
Festıváldiń úshinshi jáne sońǵy kúni ańyzdar men urpaqtar sabaqtastyǵy ıdeıasyn qozǵaıdy. Ortalyq Azıa juldyzdary - Roza Rymbaeva, Naǵıma Esqalıeva, Jámılá Serkebaeva, Erkesh Shákeev, Medeý Arynbaev, Erlan Kókeev, Ádil Chekılov, Parvız Nazarov, Jyldyz Osmonalıeva, Baýyrjan Isaev, «Dara» toby óner kórsetpek. Al, Ádil Chekılov pen Parvız Nazarov, Naǵıma Esqalıeva men Dıas Abylaev, Roza Rymbaeva eki uly Mádı Rymbaev pen Álı Oqapovpen birge dýet qurmaq!
Maýsym aıynda Almaty qalasynda ótken «Jas qanat» baıqaýynyń jeńimpazdary urpaqtar arasyndaǵy sabaqtastyqtyń belgisi bolmaq. Bir sózben aıtqanda, «Jas qanat» baıqaýyn kórmeseńiz, «Azıa daýysy» festıvaliniń arqasynda onyń úzdik qatysýshylarymen tanysýǵa tamasha múmkindik bar. Al úshinshi kúnniń basty hedlaınerleri - Ialla jáne Secret Service toptary.
Sondaı-aq, konserttiń úshinshi kúni kórermenderge taǵy bir tosyn syı usynylmaq. 30 shildede ótetin konsertke bılet alǵandardyń arasynda Chevrolet Onix kóligi oınatylady. Allur Auto usynǵan bul utys oıyny festıválge kelýshilerge tańǵajaıyp emosıalardy bastan keshirip, avtokólik utyp alý múmkindigin syılaıdy.
Endi dástúrge aınalatyn taǵy bir tańǵajaıyp jańalyq bar. «Azıa daýysy» tarıhynda alǵash ret Medeý sahnasyndaǵy qoıylymdar naǵyz estradalyq-sımfonıalyq orkestrdiń súıemeldeýimen ótedi! Ony álemdik deńgeıdegi juldyzdarmen jumys istegen, aty ańyzǵa aınalǵan dırıjer Aleksandr Belákov basqarmaq.
Almaty qalasynyń ákimdigi kórermenderdiń Medeýge ońaı jetip, qalaǵa qınalmaı oralýyn qamtamasyz etpek. Sondyqtan, festıvál kezinde qosymsha avtobýs baǵyty iske qosylady. Sátbaev pen Baıtursynov kósheleriniń qıylysynan avtobýstar saǵat 14:00-den 24:00-ge deıin 10-15 mınýt aralyqpen júretin bolady. Bir baǵytqa jol júrý quny - 150 teńge. Sonymen qatar, barlyq kelýshilerdiń qaýipsizdigin qamtamasyz etý úshin polısıa, órt sóndirý jáne jedel járdem qyzmeti kúsheıtiledi.
Dalanews.kz, Dala men Qala gazeti - "Azıa daýysy - 2023" festıvaliniń resmı aqparattyq seriktesi. Barlyq jańalyqtar bizde eń birinshi turatyn bolady!
