Almatynyń Almaly aýdandyq sotynda maýsymda adam ólimine ákep soqqan avtobýs apatyna qatysty ashyq sot otyrysy bastaldy. Jol apatynan 1 adam qaza taýyp, taǵy 25 jolaýshy ártúrli dárejedegi jaraqattar aldy. Búgin qylmystyq is boiynsha aldyn ala tyńdaý ótti, - dep habarlaidy Dalanews.kz.
Sotqa Qazaqstan Respýblikasy Qylmystyq kodeksiniń 345-babynyń 3-bóligimen abaisyzda adam ólimine ákep soqtyrǵan áreketi úshin aiyptalǵan áiel keldi. Aldyn ala sot otyrysynda sýdia is materialy birden prokýrorǵa, keiin sotqa jiberilgenin, al advokattar qylmystyq is materialdarymen tanysyp úlgermegenin, olarǵa sot otyrysynyń materialdarymen tanysý úshin qosymsha ýaqyt beriletinin málimdedi.
"Sottalýshy men onyń qorǵaýshylary qylmystyq is materialdarymen tanysýǵa múmkindikteri bolmady, tiisinshe, ótinishhattar berý quqyǵynan aiyryldy. Qorǵaýshynyń iske saraptamalyq qorytyndylar qosý týraly ótinishi basty sot talqylaýynda qaralyp, sheshiledi. Is materialdarymen tanysý týraly ótinish qosymsha ýaqyt berýmen qanaǵattandyryldy", - dedi sýdia Q.Imanqulov.
Sot ashyq sot otyrysyn 19 qarashaǵa saǵat 10:30-ǵa taǵaiyndaýdy buiyrdy.
Eske salaiyq, 26 maýsymda Almatyda avtobýs dúkenge kirip ketti degen aqparat paida bolǵany habarlandy. Kýágerler Almatydaǵy avtobýs apatynan keiingi jaǵdai týraly aitty.
