Almatydaǵy ál-Farabi dańǵylynda bolǵan jantúrshigerlik jol apatynan keiin depýtat Murat Ábenov qaladaǵy tártip pen jaýapkershilik máselesin ashyq kóterdi, dep habarlaidy Dala News.
Onyń aitýynsha, bul qaiǵyly jaǵdai kezdeisoq emes jáne aldyn alýǵa bolatyn edi.
«Bul tórt birdei kinásiz adamnyń ómirin qiǵan apat. Bul kólikti oiynshyqqa ainaldyrǵan adamdardyń saldary. Olar úshin joldaǵy basqa adamdar jai ǵana oiyn. Men búgin issaparmen Almatyǵa kelip, óz kózimmen bul zańsyzdyqtyń áli de jalǵasyp jatqanyn kórdim. Nebári 30–40 minýt ishinde ál-Farabi dańǵylymen júrip óttim. Osy jerden shamamen 500 metr nemese 1 shaqyrym jerde bolǵan apatty bile tura, dál sol kóshede kólikterdiń áli de joǵary jyldamdyqpen júitkip júrgenin kórdim», dedi depýtat.
Ol qalada zańsyz jarystar ashyq túrde ótip jatqanyn atap ótti.
«Almaty turǵyndarynyń kóbi biledi keshke qarai ál-Farabi dańǵyly zańsyz jarys ótetin orynǵa ainalady. Bul qoǵam úshin óte qaýipti. Politsiia muny biledi. Kameralar bar. Qandai kólikter, kimder qatysatyny da belgili. Biraq eshkim toqtatpaidy. Kólikter tárkilenbeidi, júrgizýshiler jazalanbaidy. Sebebi olar yqpaldy adamdardyń balalary nemese bai adamdar. Sonda zań tek qarapaiym halyqqa ǵana ma», dedi Ábenov.
Depýtat quqyq qoldanýdaǵy qos standartty synǵa aldy.
«Qarapaiym adam az ǵana alkogol ishse birden 15 táýlikke qamalyp, júrgizýshi kýáliginen aiyrylady. Al sanaly túrde 200 km saǵ jyldamdyqpen qala ishinde jarys uiymdastyryp, adam ómirine qaýip tóndirgenderge esh shara qoldanylmaidy. Bul ádiletsizdik. Qurmetti ministr Erjan Sadenov, sizdiń Almatydaǵy ókilińiz óz mindetin atqara almai otyr. Qalada tártip joq. Ál-Farabi dańǵyly túnde zańsyz jarys alańyna ainalady. Bul bolashaqtaǵy jańa qaiǵyly oqiǵalardyń bastamasy. Zań bolýy kerek. Jáne ol bárine birdei qoldanylýy tiis», dedi ol.
