Almatyda qarttarǵa arnalǵan ailyq jalǵasyp jatyr. Jumyspen qamtý jáne áleýmettik baǵdarlamalar basqarmasy aǵa býyn ókilderin qoldaý, áleýmettendirý jáne belsendi uzaq ómir saltyn qalyptastyrý maqsatynda keń aýqymdy is-sharalar uiymdastyryp keledi, dep habarlaidy Dalanews.kz.
Ai basynan beri birqatar mańyzdy is-sharalar ótti. Eń bastysy, «Belsendi uzaq ómir súrý: tájiribe jáne damý keleshegi» atty halyqaralyq forýmy. Forým áleýmettik qorǵaý jáne belsendi uzaq ómirdi qamtamasyz etý salasynda Qazaqstan men shetel mamandarynyń tájiribe almasý alańyna ainaldy. Qatysýshylar innovatsiia engizý, salaaralyq ózara is-qimyl, strategiialyq josparlaý jáne qarttardy qoldaý baǵdarlamasyn damytý máselelerin talqylady.
Búgin, 10 qazanda, eki iri is-shara ótedi: Medeý aýdandyq bólimshesinde shyǵarmashylyq ujymdar men aqyndardyń qatysýymen «Qarttarym – asyl qazynam» atty poeziia keshi ótedi. Sondai-aq, ardagerler men qalanyń qurmetti zeinetkerlerin ulyqtaýǵa arnalǵan saltanatty is-shara jáne kontserttik baǵdarlama uiymdastyrylady.
2025 jyly 15 qazanda BUU jáne Ortalyq Aziia elderiniń ókilderi qatysatyn halyqaralyq seminar aiasynda Máýlenov kóshesi, 46a mekenjaiyndaǵy Belsendi uzaq ómir súrý ortalyǵyna barý josparlanǵan. Baǵdarlamada qyzmet alýshylardyń shyǵarmashylyq kórmesi, kontserttik baǵdarlama jáne qarttarmen jumys tájiribesimen almasý qarastyrylǵan.
15 qazanda, Medeý aýdandyq bólimshesi men Medeý aýdandyq ardagerler keńesi birlesip, Halyqaralyq qarttar kúnine arnalǵan kontserttik baǵdarlamany Oqýshylar saraiynda ótkizedi.
17 qazanda saǵat 15:00-de «Art-galaksi Alma-Ata» art-galereiasynda (Nazarbaev dańǵyly, 223) «Meniń Qazaqstanym» atty kórme ashylady. Onda ortalyqtyń qyzmet alýshylarynyń shyǵarmashylyq jumystary qoiylady. Ashylý aldynda kontserttik baǵdarlama uiymdastyrylady. Kórme 2025 jyly 17 qarashaǵa deiin jalǵasyp, shamamen 120 qatysýshynyń jumysy usynylady.
22 qazanda ortalyqtyń bólimshelerinde Qazaqstan Respýblikasy kúnine arnalǵan merekelik is-sharalar ótedi, sonyń ishinde «Gúldene ber, qazaq eli» kontserti jáne «Balýan Sholaq» bólimshesiniń uiymdastyrýymen ótetin shahmat festivali bar.
24 qazanda Bostandyq aýdandyq bólimshesi uiymdastyrǵan «Jasa, Qazaqstan!» atty merekelik kontsert jáne toǵyzqumalaq pen shahmattan jarys ótedi.
Ailyqtyń qorytyndysy 2025 jyly 30 qazanda ótetin Qarttar festivalimen túiindeledi. Baǵdarlamada shyǵarmashylyq qoiylymdar, fleshmob, sán kórsetilimi, sheberlik dáristeri, dombyra orkestrleri, bi jáne vokal ujymdarynyń óneri, sondai-aq zeinetkerlerdiń shyǵarmashylyq jumystarynyń kórmesi bar. Is-sharaǵa 150-den astam oryndaýshy qatysyp, 500-den astam kórermen kelmek.
Ai boiy ortalyqtyń barlyq bólimshesinde kezdesýler, kontsertter, ekskýrsiialar, sheberlik dáristeri, sporttyq jáne mádeni is-sharalar jalǵasyp jatyr. Árbir is-sharada belsendi jáne talantty qatysýshylar, shyǵarmashylyq ujymdar men sporttyq komandalar marapattalýda.
Eske sala keteiik, «Almaty qalasynyń Belsendi uzaq ómir súrý ortalyǵy» kommýnaldyq memlekettik mekemesiniń qyzmeti aǵa býyn ókilderiniń ómir sapasyn jaqsartý men densaýlyǵyn nyǵaitýǵa baǵyttalǵan. Kún saiyn ortalyqtyń bólimshelerine 500-den astam adam keledi. Munda 40-tan astam baǵyt boiynsha áleýmettik-saýyqtyrý, mádeni, bilim berý, quqyqtyq jáne ózge de qyzmetter kórsetiledi.
